I rikapur në janar, gjashtë muaj pasi u arratis nga qelitë e një burgu të sigurisë së lartë, Joaquin Guzman mund të ekstradohet për në Shtetet e Bashkuara të Amerikës.
Vendimi është dhënë nga një gjykatës federal, duke hapur rrugën kështu që ai të përballet në SHBA me një sërë akuzash, mes të cilave ato për pastrim parash, për trafikim droge, për rrëmbime e vrasje.
Ministria e Jashtme meksikane ka 30 ditë kohë për të vendosur nëse do ta miratojë apo jo ekstradimin e bosit të drogës.
Vendimi është apeluar tashmë nga avokatët e bosit të kartelit Sinaloa, por ata janë të bindur se vendimi është politik e klienti i tyre do të ekstradohet.
Guzman u transferua këtë të shtunë në një burg të sigurisë së lartë, pranë kufirit me SHBA-të. Ekstradimi i tij pritet të ngjasë nga mesi i vitit, teksa një burim qeveritar pohoi ditën e djeshme se në javët e ardhshme nuk pritet të ketë ndonjë zhvillim të ri në lidhje me të arrestuarin.
Trafikanti më i kërkuar i drogës në botë për vite të tëra, “El Chapo” do të kapej në shkurt të 2014-ës, për t’u arratisur në korrikun e shkuar nga burgu i Altiplano-s. Në janarin e 2016-ës ai do t’i shihte përsëri hekurat në duart e tij. /tesheshi.com/
