Prokuroria e Prizrenit po e shqyrton kërkesën e familjarëve të të ndjerit Astrit Dehari, ish-aktivist i Vetëvendosjes vdekur në paraburgim, që autopsia e djalit të tyre të bëhet në prezencën e mjekëve të pavarur dhe neutralë që do të caktohen nga vet familja.
Metush Biraj, prokuror pranë organit të akuzës në Prizren, i tha Klan Kosovës se parimisht nuk kanë probleme më këtë kërkesë të familjes së të ndjerit, porse ajo duhet të shqyrtohet hollësisht për të parë a është e mundur ligjërisht të realizohet diçka e tillë.
“Ne jemi duke punuar për të parë se si do të trajtohet dëshira e familjarëve të viktimës Astrit Dehari që procesi i autopsisë të bëhet në praninë e një doktori të caktuar nga familja.
Prokuroria e Prizrenit në parim e përkrah kërkesën e familjarëve, nëse kështu do të garantohej një proces më i besueshëm për ta. Mirëpo jemi duke konsultuar paragrafët ligjorë për të parë nëse është e mundur kjo dhe nuk përben ndonjë shkelje ligjore”, tha Biraj.
Kërkesa e familjes Dehari erdhi pasi ajo i konsideroi si kontraditore deklaratat e institucioneve të ndryshme në lidhje me vdekjen e njeriut të tyre.
Astrit Dehari ishte prej më shumë se dy muajsh në paraburgim, i ndaluar si i dyshuar për sulmin me granata në godinën e parlamentit të Kosovës.
Kohë më parë, ndërroi jetë dhe vëllai i tij, Arbnor Dehari, po ashtu aktivist i VV-së, i cili pësoi aksident duke rënë nga një lartësi. /tesheshi.com/
