Si pjesë e një marrëveshjeje mes qeverisë siriane dhe rebelëve për të lejuar hyrjen e ndihmave në zonat e rrethuara, autokolonat me furnizime kanë arritur në Madaja, si dhe në Fua e Kefrejja.
OKB-ja lajmëroi se një autokolonë me ndihma e Gjysmëhënës së Kuqe kishte filluar të hynte në Madaja, e po dërgonte atje ushqim të mjaftueshëm për një muaj për 40.000 njerëz.
Ndihma po ashtu kanë arritur dhe nga Kryqi i Kuq, siç ka bërë të ditur zëdhënësi i tij, Pawel Krzysiek. Kamionë të tjerë me ndihma kanë arritur dhe në Fua e Kefrejja, që gjenden në provincën e Idlibit e janë të rrethuara nga rebelët.
Për operacionin për dërgimin e ndihmave u ra dakort javën e shkuar, pas raportimeve për gjendjen e vështirë të banorëve në zonat e rrethuara, të mbetur pa ushqim, e pasi qeveria siriane dha miratimin.
Sipas OKB-së, në Madaja ka më së paku 42.000 njerëz që nuk janë në gjendje të lëvizin që andej. Mjekët Pa Kufij kanë njoftuar për 28 të vdekur në Madaja për shkaqe të lidhura me urinë, e mes të cilëve ishin gjashtë fëmijë nën moshën një vjeç.
Gjysmëhëna e Kuqe, Kryqi i Kuq dhe OKB-ja janë mes organizmave që po dërgojnë ndihma në zonat problematike të Sirisë, ku mungojnë ushqimet dhe ilaçet. /tesheshi.com/
