Së paku 14 persona, prej tyre 6 fëmijë, kanë humbur jetën në një aksident rrugor në jug të Turqisë, kur një autobus që po transportonte fëmijë gjatë një ekskursioni ka rënë në një kanal, njoftojnë mediat turke.
Në mesin e të vdekurve janë tri vajza, tre djem dhe tetë persona tjerë, ndërsa janë lënduar me këtë rast 24 persona, njofton agjencia turke Dogan.
Sipas raportit të policisë, autobusi ishte duke u kthyer nga një zonë e njohur arkeologjike Karatepe, në afërsi të qytetit Osmanije, kur ka dalë nga rruga dhe ka rënë në kanal.
Kalimtarët dhe banorët përreth janë futur për të shpëtuar udhëtarët e ngujuar në autobus, ndërsa shumica e trupave janë nxjerrë nga zhytësit.
Shkak i aksidentit është bërë humbja e drejtimit të mjetit nga ana e shoferit, ndërkohë që policia po vijon hetimet e mëtejshme për zbardhjen e plotë të ngjarjes.
Në fotografitë e publikuara në mediat turke, shihet krani duke ngritur autobusin nga uji, ndërsa anash ka kalimtarë të tmerruar që shikojnë skenën. /tesheshi.com/
