Autobiografia e re e Armanit: një manifestim i stilit të përjetshëm

Unë krijoj një botë në të cilën luksi nuk rimon me arin dhe shkëlqimin, por me qetësinë, intimen, eteriken”, rrëfen stilisti italian në “Per Amore”, autobiografinë e tij magjepsëse të sapopublikuar nga Rizzoli. Ky është një rishikim i librit popullor që doli në vitin 2015, i pasuruar me foto të rralla, anekdotike dhe histori personale të stilistit legjendar.

Një grumbullim kujtimesh dhe tregimesh: fëmijëria në Piacenza, kujtimet e Luftës së Dytë Botërore, studimet për mjekësi në Universitetin e Milanos – një fushë që ai vendosi të ndiqte pasi lexoi romanin “The Castle” të mjekut dhe shkrimtarit skocez Archibald Joseph Cronin, vendimi për të lënë mjekësinë, puna e parë në repartin Rinascente në Milano, hapat e parë në modë tek Nino Cerutti, atmosfera dhe energjia e Milanos në vitet ’60, themelimi i Armanit me arkitektin italian Sergio Galeotti.

Megjithatë, “Per Amore” – (Për Dashuri në italisht) – nuk është një autobiografi konvencionale, por një zhytje në shpirtin dhe filozofinë e Armanit. Nëpërmjet 28 eseve të shkurtra, distilohet mençuria e një krijuesi që mbrojti me pasion klasiken dhe të përjetshmen.

“Thënë thjesht, dua më të mirën. Unë aspiroj për përsosmërinë dhe bëj gjithçka që duhet për ta arritur atë. Unë e admiroj thjeshtësinë dhe e urrej dukshmërinë. Më tërheq heshtja dhe më pëlqejnë gjërat thelbësore. Nuk më pëlqejnë ekzagjerimet dhe zhurmat, edhe nëse flasim në mënyrë metaforike…”, thotë dizenjuesi i cili ka qenë gjithmonë i qëndrueshëm dhe i vendosur në idetë e tij dhe i dashur për thjeshtësinë, luksin sugjestionues dhe tonet neutrale të krijimeve të tij.

“Procesi i krijimit fillon me disa rreshta të skicuar në letër dhe përfundon me një imazh që përfshin një numër të zgjedhur elementësh të kombinuar në një mënyrë delikate. Krijimet e mia janë të thjeshta, por të fuqishme. Për mua thjeshtësia nuk është kurrë pikënisja, por pika e mbërritjes”, shprehet ai në “Per Amore”.

Armani rrëfen se është ndjerë gjithmonë si i huaj në sistemin e modës: “Ideja e rinovimit radikal çdo gjashtë muaj nuk ka asnjë vlerë”. Për të. “gjërat e bukura nuk kanë datë skadence.

 Përkufizimi i gjerë i luksit sipas Giorgio Armani është “të kesh një mënyrë jetese pozitive dhe të shëndetshme, duke përdorur vetëm materialet më të mira, duke i mbushur me elegancë dhe rafinim”. Dizajneri që revolucionarizoi modën në vitet ’70 duke krijuar kostume “të pastrukturuara” për burra dhe gra beson se luksi është “distilimi i përsosur i vlerave që na lartësojnë”.

Në moshën 88-vjeçare, ai është gjithmonë aktiv – duke marrë pjesë në Javët e Modës dhe duke veshur yjet për tapetin e kuq.

“Mbreti Giorgio” siç e quajnë në Itali, konsiderohet si një revolucionar të modës pasi thjeshtoi imazhin e meshkujve dhe fuqizoi atë të femrave. /tesheshi.com/