Dhjetë nxënës, përfshirë autorin e vetëvrarë, kanë vdekur në një të shtënë me armë në një shkollë në Graz, konfirmoi kryebashkiakja e Grazit, Elke Kahr, për agjencinë austriake të lajmeve APA.
Transmetuesi publik austriak ORF transmetoi një intervistë të shkurtër me një zëdhënës të policisë në vendngjarje në Graz, i cili konfirmoi “disa vdekje dhe plagosje”.
Ai shtoi se vendi i ngjarjes ishte siguruar dhe se nuk kishte rrezik të mëtejshëm për publikun.
Ministrja e Jashtme Beate Meinl-Reisinger ishte zyrtarja e parë e lartë e qeverisë austriake që iu përgjigj publikisht sulmit.
Në një postim në X, ajo tha se ishte “thellësisht e tronditur” nga lajmi, duke e quajtur atë “të pakuptueshëm dhe të padurueshëm”.
“Ngushëllimet dhe hidhërimi im janë me viktimat dhe familjet e tyre. Askush nuk mund ta imagjinojë vuajtjen; si nënë e tre fëmijëve, më thyen zemrën”, shtoi ajo.
Kancelari Christian Stocker tha se të shtënat ishin “një tragjedi kombëtare që trondit thellë të gjithë vendin tonë”.
“Nuk ka fjalë për të përshkruar dhimbjen dhe pikëllimin që të gjithë ne – e gjithë Austria – po ndiejmë tani,” tha ai në një deklaratë të publikuar në X.
“Austria është në zi”
Presidenti austriak Alexander Van der Bellen gjithashtu lëshoi një deklaratë duke thënë se “ky tmerr nuk mund të shprehet me fjalë“.
“Ajo që ndodhi sot në shkollën në Graz e godet vendin tonë në zemër.”
“Këta ishin të rinj që kishin gjithë jetën përpara. Një mësues që i shoqëroi në udhëtimin e tyre. Asgjë nuk mund ta lehtësojë dhimbjen që prindërit, gjyshërit, vëllezërit e motrat dhe miqtë e të vrarëve ndiejnë në këtë moment”.
Ai tha se vendi është “i bashkuar për të duruar këtë dhimbje, së bashku” dhe do të “tregojë se forca jonë qëndron në këtë bashkim”.
Shefeja e politikës së jashtme të BE-së, Kaja Kallas, komentoi gjithashtu sulmin.
“Jam thellësisht e tronditur nga lajmi për të shtënat në shkollën në Austri. Çdo fëmijë duhet të ndihet i sigurt në shkollë dhe të jetë në gjendje të mësojë pa frikë dhe dhunë. Mendimet e mia janë me viktimat, familjet e tyre dhe popullin austriak në këtë kohë të errët”.
Sipas raportimeve, autori i dyshuar, i cili besohet të jetë një nxënës në këtë fazë, kreu vetëvrasje.
Policia tha se ata shkuan në terren rreth orës 10 të mëngjesit pasi morën një raport për të shtëna me armë zjarri që u dëgjuan në shkollë. /tesheshi.com/
