Parlamenti austriak ka miratuar dje një ligj që do t’ua bëjë shumë më të vështirë refugjatëve të mbërrijnë apo të kërkojnë azil në Austri. Ligji i ri është një përpjekje më shumë për t’u mbyllur dyert refugjatëve që kërkojnë të gjejnë strehë në Austri.
98 parlamentarë votuan pro ligjit që u mundëson autoriteteve të shpallin një gjendje të jashtëzakonshme, fillimisht për gjashtë muaj, nëse numri i refugjatëve që arrijnë në vend rritet papritmas apo kërcënon sigurinë kombëtare. 67 prej anëtarëve të parlamentit votuan kundër.
Ligji i ri parashikon një azil të kufizuar, ndërsa familjet e azilkërkuesve do ta kenë shumë të vështirë të shkojnë në Austri. Pos kësaj, azilkërkuesit, edhe ata nga Siria, mund të nxirren jashtë kufirit menjëherë pas shqyrtimit të aplikimeve të tyre.
Policia, gjithashtu, sipas këtij ligji të ri, ka të drejtë të ndalojë, të arrestojë e të deportojë refugjatë. Me këtë ligj, refugjatët mund të mbahen të paraburgosur për 14 ditë, ndryshe nga ç’parashikohej më herët, për vetëm pesë ditë.
Në të njëjtën kohë, policia austriake mund të kryejë kontrolle të përkohshme kufitare.
Ky ligj pason dhe masat që ka marrë qeveria austriake për të kontrolluar kufirin me Italinë, duke vënë kontrolle kufitare në Brenner, e duke parashikuar dhe ngritjen e një gardhi pengues.
Iniciativë që ka sjellë reagimin e kryeministrit italian, Matteo Renzi. Austria, sipas tij, po vepron “paturpësisht kundër normave europiane, kundër historisë, kundër logjikës dhe kundër të ardhmes”. /tesheshi.com/
