Një fitore 2-0 ndaj ruses Anastasia Pavlyuchenkova i ka dhënë mundësi Venus Williams-it të shkruajë emrin në gjysmëfinalet e turneut Australian Open.
Tenistja amerikane e fitoi ndeshjen falë lojës së saj dhe mundësive të çuara dëm nga kundërshtarja. Williams i fitoi setet 6-4 dhe 7-6, e do të përballet në gjysmëfinale me një tjetër amerikane, Coco Vandeweghe.
E 17-ta në botë aktualisht, Venus Williams arrin në një gjysmëfinale Grand Slam-i ndërsa është në një moshë goxha të madhe për një sport të tillë si tenisi. 36-vjeçare, ajo bëhet tenistja më në moshë që arrin në një gjysmëfinale Grand Slam-i që nga viti 1994, kur diçka të tillë e bënte Martina Navratilova në Wimbledon.
Pos kësaj, Venus Williams kthehet të luajë në një gjysmëfinale të Australian Open-it pas 14 vitesh, që nga 2003-shi.
Tenistja me ngjyrë nuk e ka fituar asnjëherë këtë turne, ndërsa do të humbiste në finale në vitin 2003 pikërisht karshi motrës së saj, Serena Williams-it. Nëse gjërat shkojnë siç duhet, ajo mund të përballet sërish këtë herë me të motrën në finale. /tesheshi.com/
