Grand Slam-i i parë i vitit kishte patur një nisje të qetë deri tani, për të ardhur te surpriza më e madhe e tij: kampioni në fuqi, fituesi gjashtë herë i turneut, numri dy i botës, Novak Xhokoviç, sapo është eliminuar nga një tenist pak i njohur, nga Uzbekistani, Denis Istomin.
Përballja mes tyre e turit të dytë ka zgjatur katër orë e 54 minuta, në një dyluftim ku numri 117 në renditjen botërore i ka dhënë një mësim të mirë pretendentit kryesor në Australian Open.
Në pesë sete, tenisti uzbek ka fituar 3-2; dy prej seteve janë marrë prej tij me tiebreak. Istomin ka fituar 7-6 setin e parë, për t’i humbur dy pasardhësit 5-7 dhe 2-6. Kthesa ka ardhur në setin e katërt, ku ai fiton sërish me tiebreak, 7-6. Në të pestin, rezultati është 6-4.
Një lojë fantastike e uzbekut, që gjatë gjithë ndeshjes ruajti një qetësi të jashtëzakonshme, me një buzëqeshje të lehtë të vazhdueshme.
Loja e serbit, në të kundërt, qe e dobët; Xhokoviç bëri shumë gabime, e pos kësaj, atij i mungoi agresiviteti i zakonshëm.
Çfarëdo që të ndodhë në këtë turne, eliminimi i Xhokoviçit do të mbetet pa dyshim e papritura më e madhe dhe ngjarja kryesore e tij. /tesheshi.com/
