Kreu i Agjencisë së Bregdetit e njëherësh studiuesi i njohur Auron Tare, është zgjedhur në një pozicion shumë të rëndësishëm në UNESCO për trashëgimin ujore.
Vendimi u mor në selinë e këtij organizmi në sesionin e vendeve anëtare të Konventës së 2001, mbi Pasurinë Kulturore Nënujore Botërore.
Me propozimin e përfaqësuesit të Argjentinës mbështetur nga Franca dhe Meksika, Këshilli Shkencor dhe Teknik i Pasurive Botërore Nënujore të UNESCO-s votoi Auron Tare si Kryetar të këtij organizmi të rëndësishëm.
Votimi ishte unanim pa asnjë votë kundër në prani edhe të sekretariatit si dhe të Drejtores së Përgjithshme të Pasurive Botërore të UNESCO-s.
Vetë Auron Tare e bën publik lajmin në faqen e tij duke vlerësuar ata që e promovuan në samit.
“Duke falënderuar të gjithë ata që me kanë mbështetur në rrugën e gjatë të përpjekjeve për mbrojtjen e trashëgimisë kulturore mendoj se ky vlerësim i takon në radhë të parë të gjithë atyre profesionistëve, dashamirësve të trashëgimisë në Shqipëri që luftojnë dhe përpiqen për mbrojtjen e saj”, deklaroi Tare. /tesheshi.com/
