Auron Tare, kërkues i zellshëm në honet e historisë dhe trashëgimisë, së hershme apo të vonë, ka ofruar disa foto nga lufta italo -greke, një pjesë e së cilës u zhvillua në territorin shqiptar. Kjo, teksa këto ditë, zhvarrimet për gjetjen e eshtrave të ushtarëve grekë në territorin shqiptar, ku veçon fusha e Dragotit në Tepelenë, kanë qenë në qendër të vëmendjes së publikut.
“Në debatin e madh që ka mbërthyer si zakonisht kur nuk bëjmë dot detyrat tona, mbi varrezat e ushtarakëve grekë, më poshtë po ofroj disa foto nga lufta italo-greke në zonën e Tepelenë-Këlcyrës. Një moment historik i cili mund të jetë një rast ideal për krijimin e një “Muzeumi në Natyrë” të frontit italo-grek. Një mundësi jo vetëm për të njohur dhe shpjeguar me fakte këtë përplasje historike, por dhe kthimin e saj në një atraksion turistik për të gjitha ata që janë të apasionuar pas turizmit kulturor dhe historik. Këto janë disa foto të repartit Lupi di Tioskana, ku pati humbje të mëdha në malin e Golikut dhe Trebeshinës. Si dhe disa foto nga Divizioni Julia të Alpineve që ishin edhe forca kryesore në këtë betejë”, shkruan Tare. /tesheshi.com/
