Një ditë më parë ishte 7 prilli, datë që në historinë e Shqipërisë përfaqëson pushtimin italian, atë fashist, në vitin 1939. Megjithatë, as shteti shqiptar e as ai italian, pothuajse nuk e përkujtojnë këtë datë, këtë zhvillim të asaj kohe. Sot jemi popuj fqinj, pa asnjë armiqësi, me raporte shumë të afërta, por për studiuesin Auron Tare duhet gjithsesi një përkujtimore shtetërore.
Ndaj, edhe pak me ironi, ai i drejtohet një enti të rëndësishëm italian në Shqipëri.
“Të nderuar Zotërinj/Zonja të Institutit Italian të Kultures.
Mbi 80, vjet të shkuara si sot, më saktë 85, anijet e flotës italiane mësynë katër portet kryesore të Shqiperisë duke filluar kështu Pushtimin e Mbretërisë së vogël Shqiptare nga Italia Fashiste. Rezistenca shqiptare, edhe pse sporadike i detyroi repartet fashiste ta mernin seriozisht zbarkimin shqiptar. Në rrafshin ndërkombtar, lufta në Portin e Durrësit dhe atë të Sarandës u përcoll nga të gjitha agjensitë ndërkombëtare të lajmeve, përfshirë edhe BBC e cila dëgjohej në të gjithë globin. Lajmi i rezistencës shqiptare kundër invadimit italian, ipas dokumentave të deklasifikuara, mbërriti edhe në tryezën e Presidentit amerikan Rosvelt dhe Sekretarit të Parë të Bashkimit Sovjetik, Stalin.
Sot në këtë 85-vjetor të kësaj ngjarjeje me pasoja të forta në historinë dhe koshiencën e popullit të vogël shqiptar, nuk u pa dhe as u dëgjua ndonjë përkujtimore nga institucionet shqiptare. Për këtë arsye, si një vend demokratik dhe antifashist që ju jeni dhe anëtare e Bashkimit Europian, po ju drejtohem me këtë lutje publike që të bëni të mundur përkujtimin e kësaj ngjarjeje kaq të rëndësishme për të dyja kombet, pra, agresionin fashist dhe rezistencën e një vendi të vogël ndaj këtij agresioni.
Si një Institucion Kulturor, jam i bindur dhe kam shpresë se Ju do të jeni i vetmi institucion në Shqipëri që mund ta kujtoni këtë ngjarje kaq të madhe dhe me pasoja historike në Luftën e Dytë Botërore.
Ne shqiptarët nuk kemi kohë për të tilla përvjetore pasi jemi të zënë me rregullimet e shtëpive për të pritur turistët italine që do të vinë këtë verë.
Ju faleminderit!”. /tesheshi.com/
