Në një status në FB, i apasionuari pas trashëgimisë, Auron Tare, që zyrtarisht mban postin e drejtorit të Agjencisë së Bregdetit, ka informuar lidhur me atë se ç’ndikim kanë patur tek fqinji ynë, Greqia, reagimet e një grupi individësh në Lezhë që janë irrituar me rivendosjen në kala të një mbishkrimi dedikuar Sulejmanit të Madhërishëm. Në fund, Tare u kujton të irrituarve faktin se me gurrët e kalave, për të cilat ata mendojnë se u ç`shenjtëruan nga një mbishkrim, nga një relike e rrallë dhe e vyer e trashëgimisë historike, kanë bërë shtëpitë e tyre gjatë këtyre viteve.
Ja statusi i Tares, shoqëruar dhe me fotot përkatëse:
“Fotot nga Kalaja e Janinës dhe Korfuzit. Mbishkrime otomane në ballin e Kalasë së Janinës dhe asaj veneciane në Korfuz. Të dy palët pushtues shekullorë. Por sot, intelektualët e Janinës dhe Korfuzit, të frymëzuar nga mësimet e intelektualëve të pavarur nga Shqipëria që janë hedhur në aksion me spraj në dorë dhe me vare, të gatshëm për të prishur mbishkrimin e pushtuesit Sulejman (atij që gjithë Shqiperia mezi pret t’i shikojë serialin turk), i cili ka urdhëruar arbërorin Dervish, të birin e Muhamet Skurës (të cilit i ka dalë emri në defterin e perandorisë që ka marrë shumë toka se u konvertua në mysliman), të rindërtojë Kalane e Lezhës, i kanë shkruar qeverisë së Tsiprasit se duan edhe ata t’i shkatërrojnë këto simbole pushtuesish. Në fakt, gazetat e sotme në Greqi ishin mbushur me deklarata të intelektualëve grekë që i kërkonin falje popullit grek se si nuk i kishin parë më parë këto mbishkrime, por i kishin mësuar nga intelektualët shqiptarë se mbishkrimet otomane dhe nishane të tjera në kala apo monumente kulture, janë të ndaluara. Prandaj, këtë javë në Greqi do të shpallet java e shkatërrimit të nishaneve të huaja në kalatë e vendit. O burra shqiptarë, mos mbesni mbrapa grekërve edhe në këtë çështje se është turp për ju që në shekuj, me pushkë në dorë, nuk keni lënë pushtues të huaj t’ju prekë foletë e shqiponjave, tani t`i lini këto nishane në muret e kalave të cilat ja u keni marrë gurët për shtëpi dhe ju a keni nxjerrë fundin me kohë”.
/tesheshi.com/
