Një xhami e vjetër nisi të shembet ditë më parë në Rrajcë të Librazhdit, gjë që ka sjellë reagimin e disa zërave në mbrojtje të trashëgimisë. I pari qe Auron Tare, i cili ka publikuar në FB foto të hjeqjes së tjegullave duke e quajtur këtë si skandaloze. Sipas tij, pretendimi se në vend të saj do të bëhet një xhami e re është i pajistifikueshëm në raport me vlerat që përçon ajo ekzistuese.
Më pas, ka qenë Artan Lame i cili ka pësuar Taren në një reagim të tijin, po në FB, duke u shprehur:
“Me ne fund erdhi dita te leme rehat Enverin atje ku eshte, se s’paska pas faj….
Sot 25.04.2015 ka filluar shkaterrimi i kesaj xhamie te vjeter ne Rajce prane Prenjasit. Besoj se pertej te gjithave, ajo xhami eshte objekti me i vjeter qe qendron ne kembe ne gjithe ate krahine.
Edhe si objekt kulti pastaj, besoj se mund te jete e vetmja e mbetur ne kembe ne te gjithe vendin, e ndertuar me kete teknike ndertimi.
Auroni me dergoi edhe nje video nga shkaterrimi i saj i sotem, e cila ngjan e pabesueshme. Po te mos qe me ngjyra, do dukej si e vitit 1967.
Sebepi eshte qe “do bejme nje xhami te re prej… betoni”. Fali Zot se s’dijne c’bejne!”
Por nuk kanë munguar dhe reagimet e shumta brenda vetë komunitetit të besimtarëve, që e kundërshtojnë rrënimin e xhamisë shumëvjeçare. Arkitekti Rajan Alliu shprehet po në FB: “Xhamia e vjeter e fshatit Rrajce Fushe, Librazhd, po shembet nga muslimanet e zones, per te ndertuar nje xhami te re !!! Ne muslimanet me duart tona po shembim historine tone, me injorancen tone po fshijme gjurmet tona te vjetra. Mos te habitemi kur neser te na thon qe jemi te huaj ne kte toke sepse s’kemi prova per te vertetuar autoktonine tone.”
Por ky i fundit nuk është ndalur më kaq. I ka shkruar një letër shqetësuese ministres Kumbaro, duke i kërkuar që të bëjë ç`është e mundur për të ndaluar shembjen e xhamisë dhe njëherësh nisjen e proçedurave për shpalljen e saj monument trashëgimie në mbrojtje. Dhe sipas arkitektit Alliu, prej ministres ka marrë një përgjigje pozitive për ndalim të prishjes së xhamisë dhe nisjen së shpejti të proçesit për ta shpallur monument, sipas kritereve që ofron.
Sipas të dhënave, xhamia vështirë të mbush kriterin e 100 viteve vjetërsi, një prej atyre që duhet të plotësojë një godinë për t`u klasifikuar si monument, por sipas atyre që e kanë parë nga afër, ajo ka elementë të veçantë arkitekturale që mund ta përfshinin tek monumentet që duhen ruajtur. Këtë mendim e shprehin dhe disa imamë, të cilët pra nuk pajtohem me prishjen e xhamisë së Rrajcës, pavarësisht dëshirës për një të re.
Nga ana e tyre, drejtues të Komunitetit thonë se kjo çështje i takon sektorit të vakfit, e derisa nuk ka qenë monument, nuk është marrë në konsideratë një ndjeshmëri e tillë e shfaqur nga mbrojtës së trashëgimisë nga rradhët e shoqërisë civile. /tesheshi.com/
