Nga Bashkim Kastrati
Ministria për Komunitete dhe Kthim (MKK), e cila udhëhiqet nga ministri serb, Dalibor Jevtiç është karakterizuar me disa parregullsi gjatë vitit 2015, sipas një raporti të Auditit të Përgjithshëm (ZAP).
Kjo ministri rezulton se gjatë vitit 2015 ka keqpërdorur sidomos veturat zyrtare. Sipas ZAP-it, Udhëzimi Administrativ nr. 03/2008 për përdorimin e automjeteve të qeverisë së Kosovës, përcakton kategoritë e zyrtarëve dhe mënyrën e përdorimit të Automjeteve Zyrtare. Sipas nenit nr. 4, pika 4.1 “Automjetet zyrtare shërbejnë për kryerjen e detyrave zyrtare dhe përdoruesit e tyre duhet t’i shfrytëzojnë ato në mënyrë sa me ekonomike dhe efikase.
Auditi shpalosi se MKK nuk kishte respektuar kërkesat e lartcekura. Shtatë automjete, më vendim të ministrit, janë dhënë tek institucionet tjera në shfrytëzim, ku dy prej tyre janë dhënë në shfrytëzim të institucionet jopublike (një në organizatën joqeveritare dhe tjetra në një radio televizion privat).
“Automjeti me targa 3Z-163-18, më datë 05.08.2013 i është dhënë në shfrytëzim organizatës jo-qeveritare “Multietnicka OJQ Agro Fokus” në Komunën e Istogut dhe automjeti me targa 3Z-158-18, më datë 26.08.2015 i është dhënë në shfrytëzim për një vit Radio KIM. Dhënia në shfrytëzim e automjeteve për organizata jo-qeveritare dhe radio televizionit privat, është keqpërdorim i automjeteve zyrtare”, thuhet në raportin e ZAP-it.
Duke marrë parasysh këtë të gjetur, ZAP i rekomandon ministrit Jevtiç që të sigurojë se ka rishikuar të gjitha marrëveshjet ekzistuese për dhënien automjeteve në shfrytëzim, dhe në rast të mungesës së ligjshmërisë së tyre t’i shfuqizoëj ato marrëveshje dhe të sigurojë kthimin e tyre në Ministri.
Nuk ua paguan fare trustin pensional zyrtarëve të ministrisë
E gjetura tjetër e ZAP-it është se Ministria për Komunitete dhe Kthim (MKK), ka realizuar dy pagesa për nëpunësit e vet, mirëpo nuk e ka mbajtur tatimin në burim dhe kontributin pensional, ashtu siç përcaktohet me Ligjin nr. 05/L-028 për tatime në të ardhura personale3. Njëra pagesë është bërë sipas vendimit gjyqësor, pagesa tjetër sipas vendimit të sekretarit të përgjithshëm. Dyja pagesat janë bërë pas hyrjes së ligjit të ri në fuqi.
“Mosmbajtja e tatimit dhe i kontributeve pensionale në paga paraqet anashkalim të kërkesave ligjore, ndikon në mbledhjen e të hyrave të përgjithshme buxhetore dhe mund të zvogëloj buxhetin e MKK-së përmes pagesës së gjobave eventuale ndaj Administratës Tatimore”, tërheq vërejtjen ZAP, ndërsa i rekomandon ministrit që të sigurojë mbajtjen e të gjitha tatimeve dhe të kontributeve pensionale në pagat e nëpunësve të Ministrisë në përputhje me Ligjin mbi tatimin në të ardhurat personale.
E gjetura tjetër ka të bëjë me mospërputhje të titullit të punës në mes akt emërimeve dhe listës së pagave. Shtatë mostrat e ZAP-it kanë treguar se në dy raste, titujt e vendit të punës së stafit të përcaktuar edhe me akt emërime nuk përputhen me titullin e vendit të punës në listën e pagave.
Sipas ZAP-it, lidhur me përmirësimin e menaxhimit të listave të pagave është rekomanduar menaxhmenti edhe në raportin e vitit paraprak. MKK ka bërë shkresa te Ministria e Administratës Publike (MAP), për të përmirësuar titujt në listat e pagave, mirëpo edhe përpos kësaj gjendja ka mbetur e njëjtë.
“Si rezultat i kontrolleve jo të mira gjatë përgatitjes së listës së pagave, ekziston rreziku që pagesat e pagave (koeficientet e pagës) të mos jenë adekuate për vendet e punës, përfshirë detyrat dhe përgjegjësitë që ushtrojnë”, thuhet ndër të tjera në raport, ndërsa i rekomandohet ministrit që të sigurohet se listat e pagave janë të përgatitura në pajtueshmëri më akt emërimet për secilin të punësuar, përfshirë pozitën dhe koeficientin e pagesës.
Shpenzime jashtë kompetencave
ZAP gjithashtu ka konstatuar se MKK më datë 20.05.2015, kishte pranuar një kërkesë nga një qytetare e Mitrovicës për mbulimin e shpenzimeve shëndetësorë. Kjo kërkesë ishte aprovuar nga MKK duke i paguar 4,000 euro nga kategoria e subvencioneve dhe transfereve. Ky shpenzim sipas natyrës bie në fushat e përgjegjësisë së Ministrisë së Shëndetësisë ose Komunën e tij/saj përkatëse.
“Shfrytëzimi i buxhetit për qëllime të cilat nuk kanë lidhje të drejtpërdrejtë me nevojat e organizatës dhe fushë veprimtarinë e saj mund të shkaktojnë humbje financiare. Kjo gjithashtu krijon ndërhyrje dhe përzierje të kompetencave me institucionet tjera të fushave përkatëse”, tërheq vërejtjen ZAP, ndërsa i rekomandon ministrit që të sigurohet se janë identifikuar qartë nevojat për subvencione dhe transfere, brenda fushës së përgjegjësisë së tyre. Më tutje, të gjitha pagesat nga kjo kategori duhet të bëhen vetëm për raste të cilat kanë karakterin e kësaj natyre. /tesheshi.com/
