Nga Blendi Gashi
Ministria për Komunitete dhe Kthim që udhëhiqet nga Dalibor Jevtiç i Listës Serbe, edhe në vitin 2016-të ka marrë kritika jo të pakta nga Auditi, pasi thuajse fare nuk i ka përfillur rekomandimet nga viti paraprak.
Ajo që bie në sy më shumë është se kjo ministri vazhdon të keqpërdorë veturat zyrtare pasi sërish ka shfrytëzuar ato jashtë limiteve të lejuara.
MKK-ja nuk ka respektuar udhëzimin administrative 03/2008, që përcakton kategoritë e zyrtarëve që kanë të drejtë shfrytëzimin e veturave zyrtare në kohëzgjatje 24 orë, pasi ka lejuar që përmes një vendimi të lëshuar në gusht 2015, ta shfrytëzojë veturën zyrtare 24 orë një person i cili nuk është punonjës i ministrisë. Vlera e karburanteve të paguara nga ministria për këtë veturë në vitin 2016 ishte 2,352 euro, ndërsa mungon edhe evidenca mbi mënyrën e shfrytëzimit të saj.
Kjo ministri vendime mbi shfrytëzimin 24 orë të veturave zyrtare ju ka lëshuar edhe pesë këshilltarëve politik, si dhe shefit të kabinetit të ministrit edhe pse shumica prej tyre nuk i kanë plotësuar fare fletudhëtimet mbi shfrytëzimin e automjeteve.
Dobësi në prokurim dhe dallavere me subvencione
Auditi në këtë ministri ka gjetur edhe dobësi në procedurat e prokurimit, pasi në planin e prokurimit nuk janë përfshirë të gjitha aktivitet e kontraktuara gjatë vitit 2016.
“Në tri procedura nuk ishte bërë njoftimi në Agjencinë Qendrore të Prokurimit, si: kontrata ‘Furnizimi me shërbime hoteliere në ndërtesën e MKK-së’, në vlerë 53,143 euro, kontrata ‘Furnizim më kamera vëzhgimi’ në vlerë 46,640 euro; dhe kontrata ‘Furnizim me mobilje’, në vlerë 9,938 euro. Sipas zyrtarit të prokurimit, arsyet e mos njoftimit në AQP, ishin: humbja në kohë për zhvillimin procedurave të prokurimit, kontratat e natyrës së njëjtë, si dhe vlerat e vogla”, thuhet në raport.
Ministria e serbit në qeverinë “Mustafa”, ka bërë shkelje edhe në subvencionimin e projekteve pasi i ka dhënë ato në kundërshtim me rregulloren e brendshme.
“Në një rast komisioni për vlerësimin e projekteve kishte pohuar se OJQ kishte plotësuar të gjitha kushtet për dhënien e subvencionit sipas formularit për kriteret e plotësuara, ndërsa testet tona shpalosen se OJQ-ja nuk e ka plotësuar njërin nga kriteret e kërkuara (buxhetin e projektit në të cilin specifikohen të gjitha aktivitetet dhe çmimi kushtues i tyre). Kjo ka ndodhur në mungese të kontrollit të mirëfilltë nga ana e komisionit vlerësues.
Në një rast OJQ kishte dorëzuar vetëm raportin financiar, pa i bashkangjitur dëshmitë mbështetëse si: faturat, dëftesat dhe dokumente tjera të cilat i dëshmojnë shpenzimet e raportuara. Ndërsa një rast tjetër OJQ-ja kishte dorëzuar raportin financiar të bashkangjitur me dëftesat dhe faturat, mirëpo ato nuk specifikonin se për çfarë qëllimi ishin kryer pagesat; dhe me vendim të menaxhmentit janë shfrytëzuar mjetet nga kategoria e subvencioneve për blerjen e mobiljeve për familjet në nevojë. Vlera e blerjeve ishte 1,383€, në këtë rast është shfrytëzuar kontrata kornize për furnizim me mobilje dhe teknikë të bardhë. Me rregulloren e brendshme për subvencione nuk parashihet shpenzimi i subvencioneve për destinime humanitare”, thuhet në raport.
Ja shkeljet tjera…
Një tjetër gjetje e Auditit është kompensimi me pagë i një të punësuare në vlerë 9 mijë euro nga kategoria e mallrave dhe shërbimeve, të cilës nuk ju kanë paguar shtesat gjatë periudhës 2009 – 2012, andaj këtë minsitria e ka bërë në formë retroaktive.
Shkeja e radhës e MKK-së është blerja e mallrave (mobileje) në vlerë prej 9,938 euro për Komunën e Shtërpcës në formë të mbështetjes financiare, bazuar në kërkesën e kryetarit të Komunës.
“Në këtë rast është shpenzuar buxheti nga kategoria mallra dhe shërbime e planifikuar për nevojat e MKK-së dhe nuk është kërkuar kompensim nga Komuna. Për më tepër këto lloje të shpenzimeve i takonin kategorisë së subvencioneve dhe transfereve. Zyrtarët përgjegjës nuk ishin të informuar se ky lloj transanksioni është në kundërshtim me ligjin”, thuhet në raport.
Edhe kjo ministri ashtu si edhe disa tjera ka tejkaluar afatin ligjor për pozitat e mbuluara me ushtrues detyre.
Sipas ligjit për shërbimin civil, neni 30, në rast të pozitave të lira, ushtruesi i detyrës nuk mund të emërohet më gjatë se tre muaj, por në MKK, pozita e sekretarit të përhershëm mbulohet me ushtrues detyre që nga viti 2013 dhe ajo e drejtorit të departamentit për politika dhe analiza nga viti 2014. /tesheshi.com/
