Nga Blendi Gashi
Mbajtja e gjashtë pozitave me ushtrues detyre, mosplotësimi i vendeve të lira të punës, menaxhimi i dobët i automjeteve zyrtare, trajtimi i borxheve në mënyrë jo të duhur, dobësia në prokurorimin publik, janë disa nga vërejtjet kryesore që Auditi i Përgjithshëm ka dhënë për Komisionin Qendror të Zgjedhjeve (KQZ) në Kosovë, për vitin 2015-të.
Kritika më e madhe e Auditit në drejtim të KQZ-së që drejtohet nga Valdete Daka, padyshim se është mbajtja e gjashtë pozitave udhëheqëse nga ushtrues detyre që nga viti 2013, edhe pse ligji për shërbimin civil parasheh që një gjë e tillë mund të bëhet vetëm për tre muaj.
Auditi tërheq vërejtjen se mbajtja e pozitave me ushtrues detyre nuk siguron se punët realizohen me kompetencë dhe përgjegjësi të plotë.
Gjithashtu, mosplotësimi i pozitave të lira mund të ketë efekt në mos përmbushjen e detyrave dhe mos realizimin e planeve të punës.
Po ashtu, për më shumë se dy vite KQZ nuk ka arritur që të plotësojë katër pozita të lira, edhe pse të aprovura me ligjin e buxhetit.
Vitin paraprak, KQZ kishte filluar procesin e rekrutimit, porse i njëjti ishte anuluar për shkak të angazhimeve rreth procesit zgjedhor, por duke mos vazhduar më pastaj me procedurat e rekrutimit.
Auditi i rekomandon kryetares së KQZ-së që të sigurojë se procedurat e rekrutimit për plotësimin e pozitave të lira fillojnë me kohë, dhe se për pozitat e udhëhequra me ushtrues detyre bëhet një zgjidhje e qëndrueshme dhe në pajtim me kërkesat ligjore.
“Automjetet zyrtare të shfrytëzohen dhe menaxhohen sipas ligjit”
Auditi tërheq vërejtjen edhe për menaxhimin e dobët të automjeteve zyrtare, konkretisht në mirëmbajtjen dhe servisimin e veturave zyrtare.
Auditi thekson se në disa raste kërkesat për servisim të veturave ishin të përgjithësuara, pa u specifikuar qartë se çka duhet të riparohej. Përveç kësaj, KQZ nuk ka paraqitur evidenca të plota për riparimet e mëparshme të automjeteve zyrtare.
I rekomandohet kryetares së KQZ-së të sigurojë se automjetet zyrtare shfrytëzohen dhe menaxhohen në pajtim me procedurat dhe rregullat ligjore
Problem edhe trajtimi i borxheve, dobësi në prokurim…
Një problem tjetër për KQZ-në mbetet trajtimi i borxheve.
Auditi në pasqyrat vjetore financiare ka hasur në obligime të pa paguara në vlerë 17,422€.
Borxhet i takojnë shpenzimeve për mallra e shërbime dhe ato komunale. KQZ nuk ka paguar obligimet ngase faturat ishin pranuar në fund të vitit, derisa detyrimet do të paguhen me buxhetin e vitit 2016.
Po ashtu, KQZ është kritikuar edhe për menaxhim jo të mirë të obligimeve.
Sipas të gjeturave të Auditit, në gjashtë raste, KQZ nuk ka kryer brenda afatit ligjor obligimet ndaj furnitorëve në total prej 7,081€, dhe nuk janë raportuar as si obligime të papaguara në Ministrinë e Financave (Thesarit). Gjithashtu mungonin raportimet për muajin janar, shkurt, mars, qershor dhe korrik.
Auditi paralajmëron se mospagesa me kohë e obligimeve mund të shpie në konteste gjyqësore mes organizatës dhe furnitorëve dhe si pasojë mund të rezultojnë edhe ndëshkime financiare.
Derisa, mungesa e raportimit i pamundëson MF/Thesarit dhe palëve tjera të interesit të kenë informacionin e duhur rreth obligimeve financiare të KQZ-së.
Auditi i rekomandon kryetares Valdete Daka që të sigurojë se detyrimet ndaj furnitorëve paguhen brenda afatit ligjor. Nëse për ndonjë arsye borxhet mbesin të papaguara, ato duhet të raportohen me kohë në MF/Thesar.
KQZ është kritikuar edhe për dobësi sistematike në prokurim, ku Auditi thotë se pagesa, zotërimi i mjeteve dhe urdhërblerja janë bërë pas pranimit të faturës apo pranimit të mallrave dhe shërbimeve.
KQZ nuk ka vendosur kontrolle efektive as në menaxhimin e kontratave publike, për çka Auditi tërheq vërejtjen se dobësit e identifikuara mund të kenë për pasojë mos implementimin e kontratave sipas kushteve të kontraktuara dhe vlerë të dobët për paranë e shpenzuar.
KQZ po ashtu është kritikuar edhe për organizimimin e brendshëm për çka Auditi thotë se nuk është bërë në pajtim me strukturën organizative, si dhe për menaxhimin jo të duhur të pasurisë jo kapitale. /tesheshi.com/
