Ministri i Rendit Fatmir Xhafaj, një ditë para protestës së opozitës, thirrur dhe për shkak të tij, e të vëllait gjithashtu, aluduar se merret me trafik droge, i ka bërë një sfidë kreut demokrat Basha.
Nëse audiopërgjimi, strumbullari i tensionit politik të ditëve të fundit me personazh Babalen, rezulton të jetë i vërtetë, atëherë ministri Xhafaj premton dorëheqjen. Në të kundërt…
“E vërteta është vetëm një, dhe vetëm një në këtë rast. Ai që nuk është në anën e të vërtetës, duhet të përgjigjet. Këtë e kërkon interesi i ligjshëm i qytetarëve.
Nëse provohet e kundërta, atëherë duhet që Lulëzim Basha të dorëhiqet dhe të përballet me ligjin. Pyeteni: A është ai i gatshëm për këtë sfidë?
Bashkëqytetarëve të thirrur në protestë, u them sot: Nëse audio përgjimi i bërë publik nga PD, do të rezultojë i vërtetë, unë do të marr çdo përgjegjësi morale, politike e ligjore, përfshi dhe largimin nga funksioni i Ministrit të Brendshëm. Jam i gatshëm ta bëj këtë pa hezitim”, shprehet Xhafaj në një mesazh në Twitter.
Si ky i fundit e si kryeministri Rama, këmbëngulin se audiopërgjimi, ku opozita pretendon se është Agron Xhafaj, është nje sajesë. /tesheshi.com/
