Shkencëtarët kanë arritur në përfundimin se Stacioni Ndërkombëtar Hapësinor është aq steril sa ka të ngjarë të ketë një ndikim negativ në shëndetin e astronautëve.
Studimi, siç raportohet nga Guardian, zbuloi se ISS është kryesisht i lirë nga mikrobet që gjenden në tokë dhe ujë që konsiderohen të dobishme për sistemin imunitar. Kjo mungesë e diversitetit mikrobik mund të shpjegojë pse astronautët shpesh përjetojnë probleme shëndetësore të lidhura me imunitetin, si puçrrat, ftohjet, infeksionet kërpudhore dhe herpesin.
Studiuesit punuan me astronautë të cilët morën mostra 803 sipërfaqe të ndryshme në ISS për të përcaktuar se cilat specie bakteriale dhe cilat kimikate ishin të pranishme në çdo mostër.
Zonat e ngrënies dhe përgatitjes së ushqimit përmbanin më shumë mikrobe të lidhura me ushqimin, ndërsa tualeti i hapësirës përmbante më shumë specie të lidhura me urinën dhe feçet. Krahasuar me shumicën e mostrave në Tokë, sipërfaqet e ISS nuk përmbanin mikrobe që zakonisht gjenden në tokë dhe ujë.
Nga ana tjetër, kimikatet nga produktet e pastrimit dhe dezinfektuesit ishin të pranishme kudo nëpër stacion. /tesheshi.com/
