Nicolas Sarkozy, ish-presidenti francez në vitet 2007-2012, është vënë nën hetim në vendin e tij për parregullsi në financat e fushatës elektorale presidenciale të 2012-ës.
Ai u mor në pyetje përpara se të njoftohej se qe nën hetim “për financim të dyshuar ilegal për një fushatë elektorale për një kandidat, që e kaloi cakun ligjor të shpenzimeve elektorale”.
Hetimi ka zbuluar se në mesin e marsit të 2012-ës janë kërkuar prej Sarkozy-t më tepër aktivitete fushate, për çka është paralajmëruar nga drejtuesi i fushatës së tij, Guillaume Lambert, se kjo rrezikonte të sillte tejkalimin e caqeve të financimit.
Vënia e tij nën hetim lajmëron një gjyq të mundshëm, por nuk çon automatikisht në procedim. Ai e ka mohuar vazhdimisht të ketë patur dijeni për llogari të dyfishta dhe për tejkalim të cakut ligjor të shpenzimeve të fushatës së tij.
Gjithsesi, vendimi për ta vënë nën hetim ngjan t’i ketë lëkundur shpresat e Sarkozy-t për një rikthim në postin më të lartë të vendit në 2017-ën.
Sarkozy e humbi betejën elektorale presidenciale të 2012-ës, dhe iu kthye aktivisht politikës dy vite më vonë, duke qenë tashmë në udhëheqje të republikanëve të së djathtës. Synimi i tij kryesor është rizgjedhja si president i vendit një vit më pas. /tesheshi.com/
