Një tjetër ekip i Madridit siguroi po mbrëmjen e së martës kualifikimin për në gjysmëfinalet e Champions League-s.
Atletiko e Madridit arriti për herë të tretë në katër sezonet e fundit në gjysmëfinale pas fitores 1-0 ndaj Lestër Sitit në ndeshjen e parë e pas barazimit 1-1 në të dytën.
Ky barazim 1-1 i dha fund dhe rrugëtimit të kampionëve të Anglisë në Champions League, i dha fund një tjetër çudie të Lestër Sitit.
Nëse do të kishte ndodhur ndryshe, për Lestër Sitin do të ishte diçka fantastike, por dhe për futbollin europian. E megjithatë, Lestëri provoi, por nuk ia doli.
Ndaj një ekipi ekspert si Atletiko u bë sa mundej në “King Power Stadium”, çka reflektohet dhe në fjalët e teknikut argjentinas të skuadrës së kualifikuar.
“Ndjej emocion, krenari dhe shpresë, pas një loje të tillë kundër një ekipi që na dha aq shumë kënaqësi për të rivalizuar, ndaj një ekipi që nuk u dorëzua,” ka deklaruar trajneri i Atletikos pas ndeshjes.
“Ishte një natë e një futbolli të pastër, me një atmosferë të mrekullueshme, kundër një ekipi që luftoi gjer në fund. Qe një lojë e zjarrtë, me raste nga të dyja palët.”
Diego Simeone mendon kështu: “Këto janë ndeshjet që njerëzit duan të shohin.” /tesheshi.com/
