Që prej ardhjes së Diego Simeone-s si trajner i Atletikos, kjo është nisja më e keqe e kampionatit për ekipin madrilen.
Kalendari ia mundësonte Atletikos të kishte gjashtë pikë të plota, pasi dy takimet e para do të luheshin ndaj ekipeve që vinin nga një kategori më poshtë. Por ka rezultuar ndryshe, shumë më vështirë se ç’pritej.
Ndërkohë që ndaj Alavesit javën e shkuar, Atletiko barazoi 1-1 në fushën e saj, ndaj Leganesit barazimi ka qenë pa gola.
Leganes luan për herë të parë në Primera Division që prej themelimit 88 vite më parë. Një skuadër më tepër se modeste, me lojtarë modestë. Veçse ia kanë dalë t’i marrin një pikë Atletikos së Madridit.
Portieri i vendasve, Serantes, ka bërë pritje të shkëlqyera, duke u kthyer në një pengesë të pakapërcyeshme për dyshen sulmuese franceze të Atletikos, Gameiro-n dhe Griezmann-in.
Atletiko ka ushtruar presion në pjesën e parë, për të rrezikuar më shumë në pjesën e dytë. I tërë mundimi ka shkuar kot, pasi madrilenët nuk kanë arritur t’i kthejnë në gol rastet e shumta.
Rezultati 0-0 i këtij takimi ka bërë që Griezmann të shprehet: “Nëse vazhdojmë kështu, do të luftojmë për t’i shpëtuar rënies nga kategoria.”
Pak më ndryshe shfaqet Diego Simeone, që përpiqet të ruajë qetësinë e të mos krijojë një atmosferë krize.
“Duhet të qëndrojmë të qetë dhe të vazhdojmë të punojmë. Me punë dhe entuziazëm do ta gjejmë atë që kërkojmë. Jam i kënaqur me punën e lojtarëve të mi.”
Në favor të Atletikos së Madridit është një ndërprerje e kampionatit, që do u japë mundësi lojtarëve të harrojnë zhgënjimin e javëve të parë. Atletikon e pret më 10 shtator sfida ndaj Selta Vigos në transfertë. /tesheshi.com/
