Lojtarët e Atletikos së Madridit nuk e kanë humbur aspak përqendrimin pas fitores së madhe të së shtunës ndaj Realit të Madridit, duke bërë mbrëmë një tjetër paraqitje mjaft të pëlqyeshme ndaj Real Sociedadit.
Mbi 35.000 shikuesit në “Vicente Calderon” mbetën të kënaqur me lojën e skuadrës së tyre, ndërsa Atletiko fitoi pa shumë kokëçarje ndaj kundërshtarit.
Një fitore e pastër për djemtë e Diego Simeones, çka i bën ata ndjekësit e vetëm të Barcelonës në luftën për titull. Rezultati 3-0 flet vetë për dominimin e plotë të vendasve, që në ndeshjet e fundit kishin shfaqur probleme të theksuar në shënimin e golave, duke realizuar vetëm dy herë në katër takime.
Shifrat u zhbllokuan në minutën e tetë, kur Diego Reyes e devijoi topin, që përfundoi në portën e skuadrës së tij. Autogoli i fillimit të takimit do të pasohej nga golat e Saul-it në minutën e 46-të dhe të Griezmann-it në të 61-tën. Francezi do të shënonte nga pika e 11-metërshit.
Në 15 minutat e fundit pati dhe pak vend për humor e cinizëm mes tifozëve të Atletikos, që nisën të thërrisnin në kor, “Qëndro Florentino”. Thirrja i referohej presidentit të Realit të Madridit, Florentino Perez, i kundërshtuar të shtunën masivisht nga përkrahësit e Realit në “Santiago Bernabeu” pasi Atletiko fitoi 0-1.
Pesë pikë është largësia aktuale mes Atletikos së Madridit dhe Barcelonës së vendit të parë. Veçse katalanasit nuk e kanë zhvilluar takimin e tyre, që do ta luajnë nesër, në transfertë, ndaj Rajo Valekanos. /tesheshi.com/
