Ndeshja e së martës në Champions League ndaj PSV Eindhovenit, me 120 minutat kapitëse, ka dhënë efektin e saj tek Atletiko e Madridit, që pasditen e kësaj të shtune ka humbur ndaj Sporting Gijonit të vendeve të fundit.
Në kushte normale, edhe pse në fushë kundërshtare, në “Estadio Municipal El Molinon” të Gijonit, fitorja dhe trepikëshi për Atletikon do të kishin qenë fare rutinë. Por te lojtarët madrilenë u ndje së tepërmi lodhja e mesjavës, aq sa në pjesën e dytë nuk arritën të krijojnë asnjë rast të pastër.
Ndeshja Sporting i Gijonit – Atletiko e Madridit, e vlefshme për javën e tridhjetë të kampionatit spanjoll, ka përfunduar 2-1, duke i ngjitur vendasit përkohësisht në vend të katërt nga fundi në renditje, e duke u dhënë shpresë për mbijetesë. Në të kundërt, madrilenët i largon akoma më tepër nga Barcelona e vendit të parë, që edhe kështu është tetë pikë para, por njëkohësisht u vë në diskutim edhe vendin e dytë.
Kjo ishte humbja e parë e Atletikos në tetë ndeshje në kampionat. Humbja e fundit për të ka qenë më 30 janar, kur ndaj Barcelonës do të humbiste po 2-1.
Gjithçka shkoi mirë fillimisht, dhe miqtë nga Madridi kaluan në epërsi madje pas golit të shënuar nga Griezmann në minutën e 29-të. Vendasit kujtohen të luajnë, e në pjesën e dytë e shtuan presionin. Golat për Gijonin u shënuan në dhjetëminutëshin e fundit të lojës. Barazimi erdhi në minutën e 79-të, kur shënoi Sanabria, ndërsa goli i fitores pasoi në të 89-n minutë. Carlos Castro i jep fitoren e pamenduar Sporting Gijonit.
Rivalët e Atletikos luajnë nesër. Barcelona udhëton për në fushën e Vilarealit, për takimin që do të zhvillohet pasdite, kurse Reali i Madridit ka në mbrëmje një provë force me Seviljen. /tesheshi.com/
