Ashtu dhe siç qe parashikuar, Atletiko e Madridit dhe Mançester Siti u kualifikuan për në çerekfinalet e Champions League-s, por gjërat nuk shkuan krejtësisht siç u menduan.
Skuadra e kryeqytetit spanjoll e pati të vështirë ndaj holandezëve të PSV Eindhovenit. Pas takimit të parë të përfunduar 0-0, mbrëmë ka pasur një tjetër 0-0, veçse të mbushur me raste dhe drithërima.
Lojtarët e Atletikos do ta nisnin vrullshëm lojën dhe do ta zotëronin atë në 45 minutat e para. Ata do t’i afroheshin golit në një seri momentesh, por Zoet, portieri i holandezëve, do të bënte një numër pritjesh shpëtimtare. Miqtë po ashtu do të kishin rastet e tyre, posasçërisht në pjesën e dytë, që gjithsesi nuk u kthyen në gol.
Futja e Fernando Torres-it në minutën e 56-të u dha zemër vendasve, ama vetëm kaq. Me lodhjen të dukshme tek ta, u shkua te shtesat nga 15 minuta. Rezultati 0-0 nuk ndryshoi gjer në fund, duke i sjellë ekipet te 11-metërshat.
Ekuilibri nuk prishet as aty. Pas një serie 7-7, në penalltinë e tetë gabon Narsingh për PSV-në. Juanfran
shënon në 11-metërshin e tetë për Atletikon, dhe kështu skuadra e Diego Simeones është për të tretin vit radhazi në çerekfinalet e Champions League-s.
Në përballjen tjetër të mbrëmjes nuk pati shumë histori. Mançester Siti e pati fituar 1-3 sfidën e parë në Ukrainë ndaj Dinamos së Kievit, kështu që u kujdes veç për administrimin e lojës në 90 minutat e dyta.
Ukrainasit u treguan të pafuqishëm të reagonin, duke e bërë takimin të mërzitshëm. Sidoqoftë, Mançester Siti pagoi një çmim të shtrenjtë për kualifikimin për herë të parë në çerekfinalet e këtij aktiviteti. Skuadra angleze humbi dy qendërmbrojtësat në takimin e së martës. Kompany u dëmtua që në minutën e pestë dhe u zëvendësua. Dëmtimi i tij është një goditje e madhe për skuadrën, që transformohet për keq pa të në fushë. Otamendi u ndërrua gjithashtu në minutën e 24-t pas një dëmtimi.
Rezultati 0-0 kualifikoi Mançester Sitin, ndërsa loja ishte për t’u harruar.
Sonte e kanë radhën takimet Bajern i Mynihut – Juventus dhe Barcelona – Arsenal, prej nga do mësohen dy çerekfinalistët e fundit. /tesheshi.com/
