“Vicente Calderon”, stadiumi ku u luajt mbrëmë çerekfinalja e dytë e Champions League-s midis Atletikos së Madridit dhe Barcelonës, premtonte që në fillim një ndeshje të jashtëzakonshme, me një skenografi po aq të jashtëzakonshme, e me 52.851 tifozë që nuk pushuan për asnjë çast së brohorituri.
Një rivalitet i paparë në fushë, me një Atletiko të mirëvendosur, që lufton për çdo top, për çdo hapësirë të fushës, për gjithçka.
Një Barcelonë që e zotëron topin për 77 për qind të lojës, por që në fund del e mundur.
Ka marrë fund seria e gjatë e fitoreve të Barçës ndaj Atletikos. Shtatë të tilla kishte siguruar Barcelona në
15 muaj. E kjo e mbrëmshmja ishte e para fitore për Atletikon gjatë kësaj periudhe, por më e rëndësishmja. Në të vërtetë, fitorja e fundit e Atletikos ndaj Barcelonës ka qenë pikërisht në këtë fazë të Champions League-s dy vite të shkuara, kur madrilenët bënin të njëjtën gjë, duke i eliminuar katalanasit.
Barcelona vinte në ndeshjen e mbrëmshme me fitoren 2-1 të takimit të parë. Rezultat të cilin nuk arriti ta mbrojë, pasi pritësit fituan 2-0.
Tepër të qartë taktikisht, me një mbrojtje të pakalueshme e me një kundërsulm vrasës, lojtarët e Atletikos kalojnë në epërsi në minutën e 36-të, pasi francezi Griezmann shënoi me kokë teksa u gjend i vetëm në zonë, i lënë i lirë nga mbrojtësit kundërshtarë.
Katalanasit u zgjuan në pjesën e dytë, dhe patën disa raste, por që mbetën të pakonkretizuara. Një tjetër kundërsulm i vendasve sjell një 11-metërsh, ndërsa Iniesta përdor krahun për të ndaluar topin. Griezmann i dyfishon shifrat. Eshtë minuta e 88-të.
Një prekje e topit me dorë nga Gabi katër minuta më pas ndez polemikat, pasi gjyqtari jep goditje të lirë, kurse ngjan që lojtari i Atletikos ta ketë bërë veprimin brenda zonës. Messi godet, por mbi portë.
Në të 95-tën minutë merr fund gjithçka. Atletiko në gjysmëfinale, kurse Barcelona eliminohet!
Lojtari më i mirë i ndeshjes shpallet Diego Godin, mbrojtësi uruguajan që shkëlqeu mbrëmë me lojën e tij.
Ndryshe, Barcelona është në momentin më të keq sezonal, me tre humbje në një periudhë të shkurtër. Po kaq në moment të keq është dhe treshja sulmuese, që nuk ka asnjë ngjasim me atë të zakonshmen. Posaçërisht Messi, që nuk shënon për Barcelonën prej 452 minutash. E mbrëmë nuk gjuajti një top brenda kuadratit të portës në Champions League për herë të parë që nga 2014-ta, pikërisht ndaj Atletikos.
Lionel Messi shënoi më 30 mars për Argjentinën, në kualifikueset amerikanolatine për në botërorin e 2018-ës, duke arritur në shifrën e 499 golave në karrierë. Që prej asaj dite, Messi nuk ka arritur ta shënojë të 500-in gol të tij.
Barcelona gjithashtu nuk ia doli të shënojë në një ndeshje të Champions League-s për herë të parë që nga prilli i vitit 2014, kur përballë kishte të njëjtën skuadër, Atletikon e Madridit.
Po mbrëmë, Bajerni i Mynihut barazoi 2-2 me Benfikën në Lisbonë. Me takimin e parë të fituar 1-0, Bajerni kaloi në gjysmëfinalet e Champions League-s.
Bajerni e Atletiko iu bashkuan Realit të Madridit dhe Mançester Sitit, që u kualifikuan një mbrëmje më herët.
Shorti i gjysmëfinaleve do të hidhet nesër në mesditë. /tesheshi.com/
