Skuadra finaliste e Champions League-s, mes më të mirave në futbollin spanjoll të viteve të fundit, ka nisur të mendojë për sezonin tjetër pa mbaruar ende ky i tanishmi.
Është mësuar se Atletiko ka arritur një marrëveshje për të marrë këtë verë argjentinasin Nico Gaitan nga Benfika.
Kontrata do të jetë katërvjeçare, e do t’i kushtojë skuadrës së Madridit 25 milionë euro.
Gaitan është një lojtar që Diego Simeone e ka për zemër, si për aftësitë golashënuese, ashtu dhe shumanshmërinë e tij. Edhe pse Atletiko është paraqitur mjaft mirë këtë sezon, ka vuajtur jo pak nga mungesa e krijueshmërisë në mesfushë. Largimi i turkut Arda Turan vitin e shkuar do të ndjehej goxha në mesfushën e Atletikos. Gaitan duket të jetë një garanci për një lojë më krijuese të Atletikos.
Gaitan i kaloi gjashtë vite te Benfika, duke qenë tashmë një lojtar i pjekur. 28-vjeçari ka shënuar 11 gola në këtë sezon, si dhe ka dhënë 19 pasime për gol.
Të premten ai luajti ndeshjen e fundit me Benfikën, duke shënuar dhe një gol në fitoren 6-2 ndaj Maritimos në finalen e Kupës së Ligës.
“Faleminderit gjithsecilit. Çdokush më ka trajtuar mirë. Mendoj se sonte ishte ndeshja ime e fundit me Benfikën.” Këto qenë fjalët e tij pas këtij takimi.
Mançester Junajtedi ka kërkuar prej vitesh ta bëjë të tijin mesfushorin argjentinas, por duket se këtu merr fund dhe interesimi për të. /tesheshi.com/
