Reali i Madridit u kthye sërish në vend të tretë me të fituar Atletiko e Barcelona takimet e tyre.
Në fillim e pati radhën Atletiko e Madridit të kalonte Rajo Valekanon. Një ndeshje e nisur me gjashtë ndërrime në formacionin e parë, e me Diego Simeonen në tribunë. Një pjesë e parë pa gola, me një mënyrë të luajturi tashmë skematike.
Ndryshimet në 45 minutat e dyta dhanë menjëherë efekt për vendasit. Griezmann shënoi vetëm pas
sekonda pas hyrjes në fushë, duke sjellë epërsinë për Atletikon. Fernando Torres, i futur në lojë po ashtu në këtë pjesë, pati rast të shënonte, por dështoi në dy përpjekje.
Një tjetër fitore e ngushtë për Atletikon e Madridit, një tjetër përfundim 1-0, një tjetër gol i shënuar nga zëvenduesit. Rekord më vete ky për Atletikon.
Humbja i kushtoi fort Rajo Valekanos, që zbriti në vend të tretë nga fundi, duke rrezikuar seriozisht ta lërë La Ligën në fund të sezonit.
Fitoreve të dy ekipeve të Madridit iu përgjigj Barcelona në të njëjtën mënyrë. Ndaj një Real Betisi pa objektiva, katalanasit e nisën qetë, për ta shtuar ritmin në pjesën e dytë.
Loja për vendasit e Betisit mori të krisur në minutën e 35-të, kur gjermani Westermann doli jashtë me të kuqe. Me dhjetë lojtarë në fushë, qe më e lehtë për miqtë katalanas që të gjenin rrugën e rrjetës. Rakitiç zhbllokon shifrat pak pas nisjes së pjesës së dytë, për t’i lënë radhën një tjetër goli të uruguajanit Suarez afër fundit të lojës. I nënti gol për të në tre javë.
0-2 për Barcelonën, që rikthehet në krye të kampionatit spanjoll. 85 pikë për të, po aq sa për Atletikon e Madridit. Vetëm një pikë pas tyre gjendet Reali i Madridit.
Dy javë të tjera për t’u luajtur, që në përfundofshin njëlloj për tre ekipet e kreut, e nxjerrin Barcelonën fituese të Primera Divizionit. /tesheshi.com/
