Në Athinë kanë nisur bisedimet mes zyrtarëve të qeverisë dhe treshes europiane të kreditorëve, por në fakt me shtimin si huadhënës të Mekanizmit Europian të Stabilitetit, ky emër nuk vlen më. Në shtyp kanë nisur të përfliten emrat e duhur për të zëvendësuar Trojkën, apo treshen e kreditorëve që për më tepër ka mbi vete edhe urrejtjen e grekëve.
Në rrjetet sociale duket se po triumfon emri Quadriga, katërshja e përfaqësuesve të kreditorëve për të reflektuar përfshirjen e MES në huadhënien për Greqinë.
Në kohët antike, Quadriga ishte një karrocë me katër kuaj që përdorej në gara, madje del edhe në rrëfimet e mitologjisë greke.
Por, nga ana tjetër, njerëzit e njohin më së shumti Quadrigan nga që qëndron mbi një nga monumentet ikonë të kryeqytetit gjerman, Berlinit, në Brandenburg Gate.
Një fakt i tillë të lë të paramendosh se edhe Quadriga nuk do të ketë fat më të mirë sesa Trojka sa i takon dashurisë së grekëve. /tesheshi/
