Që prej shkrimit të fundit kur tesheshi.com informoi mbi “Komunitetin himariot”, grupimin e ri politik që e drejton Nikollaq Neranxi, anëtarët e tij janë aktivizuar fuqishëm në mëshimin e greqizimit të Himarës, madje duke ushqyer një luftë të vërtetë verbale që duket se padyshim ushqehet nga lart dhe është një nga pasojat e përplasjes së madhe Tiranë-Athinë.
Beteja në kryeqytetin grek ka përfshirë edhe personazhe të rënda të politikës dhe opinionit publik që e kanë cilësuar tradhëtar kryetarin e Bashkisë së Himarës, Gjergji Goro, për të cilin kërkojnë që t’i hiqet nënshtetësia greke, gjë që Goro e ka marrë prej kohësh si “homogjen” dhe emrin e ka ndryshuar nga Gjergji në Jorgo.
Në pasaportën shqiptare e ka Gjergj, ndërsa në atë greke e ka Jorgo.
Ndër më aktivët janë: gazetari Stavri Marko, i cili në blogun e tij ka prapashtesën “s”, si dhe Ilir Paço, gazetar i njohur dhe folë kryesor i lajmeve të Top Channel.
Paço, kolegu dhe miku ynë, që është edhe anëtar i “Komunitetit të Himarës”, drejton një portal në gjuhën greke që emërtohet himara.gr dhe ku ka kryesisht qëndrime dhe reagime politike në lidhje me Himarën. Në fakt, lajmet ku Paço shfaqet thuajse çdo herë si autor janë të ekuilibruara përgjithësisht, por anojnë tek amplifikimi i ndodhive në Himarë, kur edhe pse erdhën autobuza nga Dukati e Fieri, më shumë se 50 vetë nuk u mblodhën në protestën e thirrur nga Neranxi.
Por pas përplasjes së Athinës dhe Tiranës zyrtare, gjuha e mesazheve që përcjellin autorët mediatikë të komunitetit himariot është e ashpër.
Në blogun e Stavri Markos përshembull, aty ku më së shumti promovohet “Himara helene”, është botuar një reagim i Failos Kranidiotis, i cili është politikan dhe drejtues mediatik në grupet pranë Nea Demokratia, partisë së djathtë dhe kryesore në opozitë.
Kranidiotis që ka të njëjtin mbiemër me ish-zv.ministrin e jashtëm grek, Janis Kranidiotis që hyri në marsin e 1997 në jugun e Shqipërisë pa leje, thekson:
“Në ditën e 28 tetorit, festës sonë kombëtare, kryebashkiaku turko-shqiptar i Himarës, Gjergji Goro, i cili shkatërroi kishën e Shën Athanasit, i ka dërguar 19 familjeve greke njoftime për prishjen e shtëpive.
Goro është një vegël e bindur e Ramës, që ka për qëllim të de-helenizimin e tokës së hetroit tonë kombëtar Spyromiliou(Spiro Milo), dikur kala e pamposhtur e shpirtit kombëtar grek në Vorio Epir.
I bëjmë thirrje qeverisë të lënë deklaratat dhe tí heqë kombësinë greke armikut të helenizmit Goro, të shpallet persona non grata në Greqi dhe të bllokohet çdo rrugë Europiane për Shqipërinë, si një hap i parë, duke kërkuar anulimin e plotë të projekteve për çamizimin dhe shkatërrimin e helenizmit.
Në qoftë se shovinistët shqiptarë nuk tërhiqen të nisin sanksione të rrepta ekonomike, madje edhe mbylljea e kufijve”.
Po ku i ka rrënjët trazimi më i fundit për Himarën?
Përplasjet për Himarën, më shumë se për 19 banesa, janë vijim i atyre që ndodhën për shkak të reformës territoriale. Ishte kjo reformë që prishi miqësinë, edhe politike mes Ramës dhe Dules, e që gjithashtu e nervozoi keq Athinën, që nisi të shoh tek Rama një armik që po jua merrte “kështjellën e tyre të pamposhtur” në bregdetin shqiptar.
Kjo për shkak se pas bashkimit të Vranishtit lab (musliman) me Himarën “greke” (ortodokse), kjo e fundit do përballet me prurjet njerëzore nga Lumit të Vlorës, çka do të thotë se për një dhjetëvjeçar, falë investimeve dhe urbanizimit të mëtejshëm të Himarës, në këtë qytet nis ndryshimi i raporteve etnike dhe fetare. Pra, Himara shkon drejt labërizimit. Vetë Rama, në replikë me Dulen gjatë seancës së miratimit të reformës territoriale, i kujtoi studimin e Çabejit të vitit 1936, ku Himara rezultonte labe – pra shqiptare – e aspak greke. /tesheshi.com/
