Ministri i Jashtëm grek Nikos Kotzias nuk do të marrë pjesë në konferencën ndërballkanike të Ministrave të Jashtëm në Tiranë që do zhvillohet në 22 Maj. Gazeta greke ‘To Vima’ në një shkrim me titull “Tirana vë në dyshim zonat për kërkimet e naftës në Jon” thekson se shefi i diplomacisë greke pas notës së protestës nga Tirana ka refuzuar pjesëmarrjen në samitin e SEECPas. Në artikullin e ‘To Vima’ theksohet se ende nuk dihet se kush do ta përfaqësojë Greqinë në samitin e lartë ndërballkanik që mbahet 4 ditë më vonë në kryeqytetin shqiptar.
“To Vima” shkruan se në këtë vendim të Tiranës ka ndikuar dhe Turqia. “Në këtë pikë është i qartë ndikimi i Ankarasë, e cila investon në marrëdhëniet me Tiranën, siç dëshmohet nga vizita e fundit e Presidentit të Turqisë, Recep Tayyip Erdogan”, theksohet në artikullin e gazetës greke.
Bushati
Në konferencën për shtyp të mbajtur në Bruksel, pas mbledhjes së Këshillit të Stabilizim-Asociimit, ministri i Jashtëm, Ditmir Bushati ka folur edhe për marrëdhëniet me Greqinë, pas lajmeve të ditëve të fundit për një tensionim të tyre.
Në fjalën e tij, Bushati ka theksuar se, Greqia është partner strategjik i Shqipërisë në rajon dhe se Tirana zyrtare është e interesuar për marrëdhënie të mira fqinjësore.
“Problemet do të zgjidhen sipas rregullave ndërkombëtare”, ka thënë Bushati, i cili ka mohuar lajmet e publikuara në media se, homologu i tij helen ka anuluar vizitën në Tiranë.
“Nuk kam ndonjë informacion për anulimin e vizitës së ministrit të Jashtëm grek. Kam qenë në kontakt me të për të adresuar problemet e mbetura pezull në bazë të rregullave ndërkombëtare”, ka nënvizuar Bushati.
