Athina ka arritur të ndikojë tek Brukseli që të vendoset në Progres-Raportin e vitit 2015 çështja e Kishës së Dhërmiut. Siç bëjnë të ditur mediat greke, në dokumentin që pritet të publikohet së shpejti do të tërhiqet vëmendja ndaj autoriteteve shqiptare që të respektojnë liritë fetare të qytetarëve të vendit.
Eurodeputeti grek, Manolis Kefalogiannis citohet nga mediat greke të ketë deklaruar se çështja e prishjes së kishës do të jetë dhe një pikë e posaçme në Progres-Raportin e pritshëm për Shqipërinë.
Konkretisht, Komisioni Europian i drejtuar nga Jean Claude Jucker, i ka kthyer përgjigje zyrtare një letre të eurodeputetit grek Kefalogianni, për shqetësimin e shprehur prej tij rreth prishjes së kishës së përfolur në Dhërmi.
Sipas mediave greke, të cilat kanë shkëputur disa pjesë nga përgjigja e Komisionit, theksohet se “respektimi i të drejtave të njeriut dhe lirive fetare janë vlera themelore të Bashkimit Evropian”. “Tek një vend kandidat për në Bashkimin Europian duhet të sundojë respekti ndaj ligjit, si dhe të ruajë lirinë fetare e trashëgiminë kulturore”, thuhet në përgjigjen që zyra e Komisionit Europian ka bërë publike pas ankesës së eurodeputetit grek. /tesheshi.com/
