Prokurori i shtetit bullgar Ivan Geçev mbeti i padëmtuar sot pas shpërthimit të një bombe në anë të rrugës dhe autokolonës së makinave në të cilën ndodhej ai me familjen e tij, thanë autoritetet bullgare, të cilat e cilësuan ngjarjen si “vrasje të mbetur në tentativë”, transmeton AFP.
Geçev “ishte objektivi i një atentati, nuk ishte thjesht frikësim,” u tha gazetarëve zëvendësi i tij Borislav Sarafov.
Autoritetet thanë se karvani i prokurorit të shtetit po shkonte për në Sofje kur, rreth orës 11:30 të mëngjesit me orën lokale, bomba shpërtheu pranë rrugës.
“Bomba nuk ishte e mbushur vetëm me tritol (rreth tre kilogram), por kishte edhe copëza. Ishte një sulm i përgatitur nga profesionistë dhe padyshim që ishte ekzekutuar shumë mirë”, tha Sarafov.
Sipas tij, Geçev dhe familja e tij janë të padëmtuar, njoftojnë agjencitë dhe shtojnë se Prokuroria ka hapur hetime.
Një figurë kontroverse prej vitesh, Geçev, mandati i të cilit zgjat deri në vitin 2026, është kritikuar për mbrojtjen e figurave të caktuara në pushtet dhe pengimin e zbulimit të skandaleve korruptive. /tesheshi.com/
