Policia e Durrësit po vijon hetimet për të zbardhur arsyet e atentatit ndaj biznesmenit Dashamir Gjoka, ngjarje e ndodhur pak ditë më parë. Sikundër raportohet policia ka vënë nën hetim dy vëllezër, banues në Shijak, të cilët dyshohet se qëlluan 15 plumba në drejtim të makinës së blinduar të biznesmenit, i cili po udhëtonte me familjarë të tij.
Fatmirësisht nga ky atentat nuk ka pasur të lënduar. Policia lokale e Shijakut për këtë ngjarje kriminale është vënë në dijeni nga Gjoka, i cili është paraqitur së bashku me tre vajzat dhe makinën e blindur në policinë e Shijakut.
Gjoka nuk ka qënë në gjëndje të identifikonte autorët, por u ka thënë hetuesve se ishte duke shkuar drejt Shijakut, dhe se një makinë i është afruar paralelisht dhe e ka qëlluar me breshëri në mënyrë të rufeshme. “Unë dhe vajzat u tmerruam kur dëgjuam të shtënat. i dhashë gaz makinës për të mos më kapur më plumbat dhe jam drejtuar direkt për në komisariat. Nuk e di kush më ka bërë atentat. Fati i madh që shpëtuam, pasi makina ishte e blinduar” mësohet të jetë shprehur Dashamir Gjoka në dëshminë që ka dhënë përpara grupit të hetimit.
Megjithëse biznesmeni nuk ka qënë në gjëndje të bënte identifikimin e personave, nga ana e saj nëpërmjet informacioneve operative, policia e Durrësit në një komunikatë për shtyp thotë se autorë të kësaj tentative vrasje janë dy vëllezërit E.Kërtalla 32 vjeç dhe M.Kërtalla 36 vjeç. Më tej në komunikatë sqarohet se gjatë kqyerjes në vendin e ngjarjes u fiksuan në cilësinë e provës materiale 26 copë gëzhoja, model 56, kalibër 7.62 mm. Në cilësinë e provës materiale është bllokuar dhe mjeti tip “Benz”, në të cilin dyshohet se kanë qenë dy autorët e dyshuar në momentin e goditjes me armë zjarri”.
Një burim pranë prokurorisë së Durrësit i tha gazetës “Shqiptarja.com” se policia ka referuar informacion për dy vëllezërit Kërtalla, pasi daja i tyre ka pasur një konflikt gjatë vitit 1997 me Dashamir Gjokën.
Shkak i këtij konflikte të hershëm, kanë qënë fajdet financiare mes palëve dhe sipas informacioneve operative, dy vëllezërit kanë dashur të hakmerren. Prej 24 orësh dy vëllezërit nuk janë gjetur nga policia e Durrësit dhe e Shijakut. Tashmë polici-prokurori janë duke punuar për lokalizimin dhe arrestimin e dy vëllezërve Kërtalla, me qëllim sqarimin e plotë të pozicionit të tyre në këtë ngjarje.
Ndërkohë momentalisht çështja kundër tyre është rregjistruar për veprën penale të “Vrasja në rrethana të tjera cilësuese” në bashkëpunim e mbetur në tentative dhe ”Prodhimi dhe mbajtja pa leje e armëve luftarake dhe e municionit”.
Gjithashtu në gjykatën e Durrësit Dashamir Gjoka ka qënë në procces gjykimi, pasi ndaj tij prokuroria e këtij qyteti kishte ngritur akuzën e “pastrimit të produkteve të veprës penale”. Një burim pranë prokurorisë tha se Gjoka për këtë akuzë ka marrë pafajësi. Ndërkohë sipas një njoftimi zyrtar të muajit Mars 2016, Prokuroria ka dërguar për gjykim shtetasit Dashamir Gjoka, duke e akuzuar për pastrim parash dhe krijim të asetesh pasurore me financime që rrjedhin nga aktiviteti kriminal në Itali, vepra penale të kryera gjatë viteve 2002-2003. /tesheshi.com/
