Si reagim ndaj atentatit me shënjestër makinën ku ndodhej prokurori i Durrësit Arjan Ndoja, si dhe figura e krimit më e njohur në zonën mes Shijakut e Sukthit, Alaksandër Lahe, ose ndryshe Landi Muharremi, kreu demokrat Basha e renditi atë si “më të rëndën ngjarje mafioze”.
“Atentati ndaj një prokurori është ngjarja më e rëndë mafioze që mund të ndodhë në një vend”, shkroi Basha në FB.
Por ndërkohë, pak vite më parë, kur për ironi fati Basha ishte dhe ministër Rendi, në mes të Vlorës do shpërthente automjeti që mbante brenda gjyqtarin Konomi, e ky i fundit do jepte shpirt mes flakëve në sy të njerëzve që e shihnin përzhitjen e tij dhe të automjetit, pa mundur dot ta shpëtonin. Ky rast nuk është zbardhur ende, e aludohet se si shkak ka patur pronat.
Megjithatë, në pozita opozitari, Basha dikton amnezi publike për të djeshmen, duke potencuar vetëm të sotmen.
“Ngjarja e sotme tregon se krimi nuk e ka frikë shtetin. Më e rëndë është situata kur kjo ngjarje kriminale u parapri nga kërcënime direkte të kryeministrit dhe zëvendëskryeministrit ndaj këtij prokurori, i cili nëse dyshohej se ka shkelur ligjin duhet të çohej para drejtësisë e jo të linçohej publikisht.
Zbardhja sa më parë e kësaj ngjarje të rëndë dhe vënia para drejtësisë e autorëve dhe porositësve të këtij krimi mafioz është jetike për të dëshmuar se shteti nuk ka kapitulluar totalisht para krimit”, shkruan Basha, ndërkohë pra që nuk është zbardhur ajo çfarë ndodhi me Skerdilajt Konomin 6 vite më parë. /tesheshi.com/
