I biri 19 vjeç kërkohet prej ditësh nga policia, si autor i një atentati që la të plagosur babë e bir, kreun e Policisë Bashkiake të Shkodrës Mentor Hasanaj me të atin, e babai ish-polici kufiri, i bën thirrje evlatit të vet që të dorëzohet.
Kështu u shpreh Arben Hasanaj për të birin Ilirian Hasanaj, të cilit i ka ardhur si bombë ajo që ka ndodhur.
“Familja e Hasanaj jetojnë në një fshat më larg se ne. Ajo është familje e respektuar. S’kemi pasur kurrë konflikte dhe asnjë lidhje me ta në kuptimin e keq të fjalës. Unë kam shumë respekt dhe është familje e mirë.
Unë dua të gjej djalin. Unë mbështes Policinë e Shtetit. Unë kam qenë polic kufiri dhe kam dalë në pension me dëshirë.
Mua, Drejtori i Policisë dhe të gjithë me rradhë do më kenë sikur jam në polici.
Djali është fëmija im dhe shpirti im, por duhet të vijë të japë llogari.
“Të dorëzohet në emrin tim!.
I lutem me mish e me shpirt gjithkujt që e njeh dhe e dikton djalin tim, që të më njoftojë. Më bën nder. Unë nuk kam dijeni fare për djalin”, tha para gazetarëve Arben Hasanaj.
Ai siguroi median se nuk ka asnjë dijeni se pse i biri ka qëlluar mbi ta, duke dhënë të kuptuar se është befasuar e tronditur nga fakti që ai, 19 vjeç, ka tentuar të vrasë dikë, aq më tepër një zyrtar shteti me detyrë kryepolic. /tesheshi.com/
