Kur në fillim të verës një shqiptar u vra në Ekuador, e në Tiranë në të njëjtën kohë ziente debati i kanabizimit, kishte mbi një vit që DEA amerikane dhe policitë europiane i ishin futur në themel grupeve shqiptare të trafikimit të kokainës, të cilat në Britaninë e Madhe, Holandë dhe Gjermani po përparonin frikshëm, duke zënë vendin e Ndrageda-s kalabreze që kontrollon prej vitesh portin e Hamburgut një nga zonat më të mëdha të shpërndarjes me shumicë së drogës qe vjen nga Amerika Latine.
Por tre ditë më parë, një tjetër shqiptar është qëlluar në një qytet të Ekuadorit, Guajakuil, qyteti më i populluar i vendit dhe qendra e preferuar e trafikantëve të kokainës.
Policia vendore ka dhënë pak detaje mbi ngjarjen, por sipas mediave vendase bëhet fjalë për Remzi Azemin, një shqiptar nga Kosova, i cili është qëlluar nga dy persona që ndodheshin në motor teksa një grua që ndodhej me Azemin hapi xhamin e derës së makinës së blinduar, pasi po tymoste duhan.
Shqiptari ndodhet jashtë rrezikut për jetën dhe mësohet se është në duart e DEA-s amerikane, e cila po heton prej kohësh aktivitetin e shqiptarëve në Ekuator.
Pesë muaj më parë në ketë vend u vra Ilir Hidri, një shqiptar nga Vora dhe mediat vendase thonë se ngjarja e tre ditëve më parë ka lidhje pikërisht me këtë vrasje.
Po ç’duan shqiptarët në Ekuador? Ky vend ka një pozicion tejet strategjik, pasi ndodhet mes Kolumbisë dhe Perusë, dy prodhuesit më të mëdhenj të kokainës në Amerikën Latine.
Prej vitit 2015 dollari është monedha kryesore e këmbimit në vend dhe kjo ka krijuar kushte të mira për trafikantët e drogës që të pastrojnë dhe ruajnë paratë e tyre në këtë vend.
DEA e konsideron si një postacion kyç të veprimtarisë së saj Euadorin. Kjo agjenci ka gjurmuar e para që grupet shqiptare kanë arritur që të bëhen tërheqësit in primus të kokainës direkt nga tregtarët e drogës që vijnë nga Kolumbia dhe Peruja.
Në Ekuador është krijuar një komunitet i vogël shqiptarësh që jeton aty dhe merret vetëm me sigurimin e mallit nga prodhuesit, si dhe lëvizjen e parave që vijnë nga droga dhe përdoren për të blerë kokainën.
Enigma është se ç’përfaqëson Remzi Azemi dhe a kemi të bëjmë me përplasjen e dy grupeve të fuqishme të trafikantëve të kokainës, njëri i Shqipërisë dhe tjetri i Kosovës apo një larje hesapesh mes rivalëve brenda një grupi të madh?
Prej disa vitesh ka pasur një integrim apo aleancë të rëndësishme të grupeve të krimit në Shqipëri dhe Kosovë, të cilat e kanë Prizren, qendrën nevralgjike të tyre ku kryqëzohen jo vetëm rrugët e trafikut dhe shkëmbimit, por aty ndodhen dhe facilitete infrastrukturore për riciklimin e parave nëpërmjet investimeve në sektorët e bixhozit dhe dëfrimit.
Megjithatë, mësohet se kjo luftë që ka shpërthyer në Ekuador po bëhet për sasira të mëdha parash që janë depozituar atje.
DEA ka arritur të hyjë edhe në disa grupe të mëdha trafikantësh shqiptarë nga Britania e Madhe dhe Holanda, të cilët po hyjnë në nivelet e larta të klasifikimit në krahasim me grupet e tjera të krimit të organizuar.
Madje mësohet se prej kohësh, depërtimi brenda grupeve ka arritur edhe rezultate të rëndësishme të zbulimit të aktivitetit të tyre, ku u është bërë dhe identifikimi i kokës së vërtetë të krimit ndodhet në Tiranë.
Ilir Hidri, i vrarë pesë muaj më parë ishte arrestuar në Spanjë si pjesë e një grupi ndërkombëtar trafiku të kokainës, nga Ekuadori në Spanjë, drogë kjo që shpërndahej më pas edhe në vende të tjera të Europës.
Për rastin në fjalë janë angazhuar edhe autoritetet shqiptare. Fillimisht ishte Ministria Jashtme e cila kërkoi informacione nga autoritetet akuadoriane dhe më pas edhe vetë Prokuroria për Krimet e Rënda që kërkoi detaje rreth tij. /tesheshi.com/
