Napoli kishte provuar ta ndalte më herët hovin e Juventusit në Serinë A, me një barazim 1-1 më 2 prill në “San Paolo”. E bëri të njëjtën gjë mbrëmë Atalanta, që barazoi 2-2 me gjysmëfinalistët e Champions League-s.
Me Etrit Berishën në portë, Atalanta po zhvillon një sezon mjaft të mirë, aq sa pretendon të jetë pjesë e katërshes së parë në fund të kampionatit; një pozicion që do t’i mundësonte pjesëmarrjen në aktivitetet europiane në sezonin e ardhshëm.
Në ndeshjen hapëse të javës së 34-t, Atalanta ia ka dalë ta frenojë Juventusin në çastet e fundit, atëherë kur miqtë po i afroheshin një tjetër fitoreje.
Conti do t’i kalonte vendasit në epërsi në minutën e 45-t, ndërkohë që Juventusi i përmbysi shifrat dhe mori avantazhin me një autogol të Spinazzola-s dhe një gol të Dani Alves-it shtatë minuta para mbarimit të lojës. Freuler e çoi rezultatin në 2-2 në minutën e 89-të.
Për Gian Piero Gasperini-n, teknikun e Atalantës, ka qenë një ndeshje e përsosur.
“Mendoj se 2-2 është një rezultat i mirë, …ishte një ndeshje praktikisht e përsosur,” do të thoshte ai pas mbarimit të lojës.
“Të luash një pjesë të parë si kjo ndaj një ekipi aq të fortë si Juventusi na jep shumë kënaqësi. Europa? Kemi ende katër ndeshje të tjera vendimtare, por pika këtë mbrëmje është një shtysë e madhe morale. Tani nuk na mungojnë shumë pikë.”
Atalanta është ngjitur në kuotën e 64 pikëve, në vend të pestë. Po kaq pikë ka dhe Lacio e vendit të katërt, por me një ndeshje më pak. Lacialët i pret mesditën e së dielës derbi me Romën. /tesheshi.com/
