Një ndër eksponentët më të lartë të Partisë Demokratike në të shkuarën jo fort të largët, Astrit Patozi ka reaguar për humbjen e grupimit të tij politik në Dibër.
Dhe ndryshe një mase të madhe njerëzish, partiakë apo mediatikë, që shohin tragjizëm në humbjen e PD-së, Patozi tregohet më i ftohtë, duke mos e parë aq plot gotën e PS-së.
Në një analizë të tij mbi zgjedhjet për kryetarin e bashkisë në Dibër, Astrit Patozi shkruan duke iu referuar gëzimit të shpërthyer te socialistët: “…nuk çuditem as me sasinë dhe as me cilësinë e gjelave që po krekosen në majë të plehut të Tiranës për fitoren ‘historike’ të Ramave në Peshkopi. E di, gjithashtu, se nesër këto zëra do të shtohen, dhe se këtë muzikë do të përpiqen ta mbajnë sa më gjatë në qarkullim…”
“Por,” kujton Patozi, “e gjitha kjo ngjan me të sëmurin e pashpresë, që thjesht e mbajnë me serum në sallën e reanimacionit.”
“Rezultati i Dibrës, edhe pse i thellë, është shumë pak për të mbuluar rrënimin e pandalshëm të një qeverie të brejtur nga korrupsioni dhe skandalet e njëpasnjëshme, në aleancë të hapur dhe të fshehur 3-vjeçare me krimin e organizuar,” sjell në vëmendje ish-kryetari i grupit parlamentar të PD-së.
“Ajo që duhet të na shqetësojë mbi të gjitha, jo vetëm si politikanë, por edhe si qytetarë, është fakti se Dibra rinxori në pazar të gjitha sëmundjet më të këqija të zgjedhjeve tona…,” vë gishtin në plagë ai.
Duke dashur t’i japë zemër elektoratit të djathtë, Patozi e mbyll kësisoj ligjërimin e tij, “…t’i lëmë të dy Ramat e PS-së, dhe të gjithë aleatët e tyre politikanë dhe trafikantë, që t’i gëzohen fitores së vogël në Dibër, dhe të përgatitemi fort e që tani për fitoren e madhe të 2017-ës.” /tesheshi.com/
