Edhe pse pothuajse të gjithë tentativat e deritanishme me parti të reja kundër atyre tradicionale kanë dështuar, Astrit Patozi e sheh të nevojshme një forcë alternative me tjetër brum, tjetër moral.
I ftuar në Top Talk, duke folur me kritika ndaj PD-së nën Bashë, Patozi tha se nuk ka pse mbahet shpresë te kjo parti
“Zgjidhja sipas meje nuk është më te Partia Demokratike. S’ka kuptim që ne të zihemi për çelësat e SHQUP-it, që sipas meje janë çelësat e kashtës. Nuk ka kuptim që disa demokratë të mërzitur me Lulzim Bashën të marrin tashmë PD-në. Megjithatë, unë zgjidhjen e kërkoj nga shoqëria shqiptare, nga njerëzit që ndihen të djathtë, të mashtruar nga të dyja kampet politike, si nga qeveria, ashtu dhe nga opozita zyrtare, të cilët janë të detyruar të ndërmarrin një reagim, një lëvizje politike që mund ta shkundë sistemin. Unë tek ata e pres dhe jo te Partia Demokratike”, tha Patozi.
Por ai nuk specifikoi asgjë më tej, nëse po punon për një kauzë të tillë.
Patozi kishte mbetur në heshtje prej mujash, gjersa reagoi një ditën më parë në përkujtimoren kushtuar të ndjerit Azem Hajdari, kur tha se PD e sotme është me keq se ajo e para 20 viteve. /tesheshi.com/
