Policia ka arrestuar dhe tre protestues të tjerë te “Astiri”, atje ku prej afro një viti kundërshtohet projekti i ndërtimit të Unazës së Re, pasi një numër banorësh nuk janë dakort me ofertën qeveritare për lirimin e banesave që do shemben.
E shndërruan dhe në kauzë politike, diktuar për të qenë e tillë nga opozita e cila është vënë në krye të protestave, “Astiri” vijon të jetë problematik nga fakti se shoqërohet me ritin e bllokimit të rrugës. Ndaj, qeveria vendosi ashpërsimin e Kodit Penal, duke pasuar me arrestime çdo bllokim rruge.
Por kjo e ka tensionuar dhe më tej situatën, pasi PD është angazhuar dhe më fort politikisht. Në një deklaratë të fundit, ajo kërkon lirimin e menjëhershëm të të arrestuarve.
“Banorët e Unazës së Re nuk kanë kryer asnjë krim. Ata nuk janë vrasës, trafikantë droge apo hajdutë të pasurive publike. Ata janë njerëz të lirë, që me dinjitet dhe vendosmëri ushtrojnë një të drejtë themelore – të drejën e tubimit paqësor.
E drejta për të protestuar është themeli i një shoqërie demokratike, njohur nga Kushtetuta dhe Konventa Europiane për të Drejtat e Njeriut.
Partia Demokratike paralajmëron urdhëruesit dhe ekzekutorët e aktit banditesk të arrestimit politik të qytetarëve se do të përballen me forcën e ligjit. Në burg do të përfundojë secili prej tyre që sot u heq lirinë në mënyrë antikushtetuese protestuesve të Unazës së Re.
Përfaqësues të Partisë Demokratike kanë qenë dhe do të jenë përkrah banorëve të Unazës së Re, falë protestës dhe vendosmërisë së të cilëve, u zbulua një nga aferat më të mëdha korruptive në vend”, thuhet ndër të tjera në deklaratën e PD-së. /tesheshi.com/
