Në mbrëmje, Policia e Shtetit shpërndau një deklaratë për shtyp, duke ofruar një rezyme të sajën për atë çfarë ndodhi në zonën e “Astirit” që nga ora 6 e mëngjesit.
“Sot, në rrugën ‘Teodor Keko’, në afërsi të sheshit ‘Shqiponja’, rreth orës 06:00 të mëngjesit një grup personash, në bashkëpunim me njëri-tjetrin kanë goditur me gurë, sende të forta dhe bomba molotov punonjësit e policisë si dhe punonjësit e policisë bashkiake, të cilët ishin dislokuar në këtë rrugë për të ushtruar detyrën në lidhje me zbatimin e planit të masës për shembjen e 33 objekteve që preken nga projekti i rrugës.
Si pasojë e sulmit me gurë, sende të forta dhe bombave molotov mbetën të plagosur 5 punonjës Policisë nga FNSH-ja, Shqiponjat dhe nga Patrullat e përgjithshme. Gjithashtu, gjatë sulmit me gurë e sende të forta dhe bombave molotov, është dëmtuar 1 automjet i Policisë”, thuhet në deklaratë, ku më pas thuhet se ç’masa janë marrë.
“Në lidhje me ngjarjen, specialistët për Hetimin e Krimit në Komisariatin e Policisë Nr. 6 në përfundim të veprimeve hetimore, bazuar prova dhe pamje filmike të ditëve paraardhëse nën drejtimin e Prokurorisë së Rrethit Gjyqësor Tiranë bënë ndalimin për veprën penale ‘Kundërshtim me dhunë të punonjësit të policisë së rendit’, të shtetasit në kërkim Sh.S., 46 vjeç, banues në Tiranë.
Gjithashtu, në vijim të veprimeve u proceduan në gjëndje të lirë për veprat penale ‘Organizimi dhe pjesmarrja në grumbullime dhe manifestime të paligjshme’, ‘Goditje për shkak të detyrë’, ‘Kundërshtimi me dhunë i punonjësit të policisë së rendit’, ‘Prishje e rendit dhe e qetësisë publike’, ‘Mbajtja dhe përdorimi i lëndëve plasëse dhe piroteknike’, dhe ‘Shkatërrim prone’ i 25 shtetasve, nga 22 deri në 73 vjeç”, thuhet në deklaratë. /tesheshi.com/
