Ka shkuar deri në përgjakje përplasja mes banorëve të zonës së Bregut të Lumit dhe forcave policore, një tjetër “Astir” në Tiranë, atje ku po shtrihet Bulevardi i Ri që nis nga ish-Stacioni i Trenit e përfundon në Paskuqan.
Përplasjet nisën që dje, kur fadromat ju afruan zonës me disa shtëpi të planifikuar për shembje. Banorët e tyre pretendojnë se nuk janë kompensuar, e kështu reaguan deri dhe me mjete rrethanore, duke patur si gjithnjë mbështetjen e ish-deputetëve të opozitës.
Por mëngjesin e kësaj të marte situata është agravuar edhe më pasi ka patur dhe konfrontime fizike, gjithnjë mes banorëve dhe forcave të rendit. Si pasojë, disa banorë janë lënduar deri në gjakosje, e 6 sosh janë shoqëruar në komisariat për kundërshtim të dhunshëm të uniformave blu.
Ish-deputetët Aldo Bumçi, Klevis Balliu e Jorida Tabaku, ishin në terrenin e përplasjes, duke u bërë pararoja politike e reagimit të banorëve. /teshesh.com/
