Ministrja e Jashtme Australiane Penny Wong tha të shtunën se rasti i themeluesit të burgosur të Wikileaks, Julian Assange “është zvarritur për një kohë të gjatë” dhe duhet të zgjidhet.
Assange, një shtetas australian në paraburgim në Mbretërinë e Bashkuar, po lufton ekstradimin në Shtetet e Bashkuara, të cilat po kërkojnë ekstradimin e tij për 18 akuza që lidhen me lëshimin e dosjeve të klasifikuara ushtarake amerikane dhe kabllogrameve diplomatike në 2010.
Në një konferencë shtypi në Brisbane, pas një samiti me Sekretarin e Shtetit të SHBA Antony Blinken dhe Sekretarin e Mbrojtjes së SHBA-së, Wong theksoi se Canberra e bëri të qartë se “çështja e zotit Assange është zvarritur për një kohë të gjatë dhe është dëshira jonë që të mbyllet”.
Tema e bisedimeve dypalëshe
Në një konferencë të përbashkët shtypi me ministrin australian të Mbrojtjes Richard Marles, Sekretarin amerikan të Shtetit Antony Blinken dhe Sekretarin amerikan të mbrojtjes Lloyd Austin, Wong tha se kishte kufizime në atë që mund të bëhej derisa të përfundonin procedurat ligjore të Assange.
“Jam në dijeni se zoti Assange ka aplikuar për të rinovuar ankesën në Mbretërinë e Bashkuar. Qeveria australiane nuk është palë në këtë proces ligjor dhe ne nuk mund të ndërhyjmë”, tha ajo.
Blinken konfirmoi se rasti i Assange ishte objekt i bisedimeve dypalëshe, duke vënë në dukje se ai i kuptonte pikëpamjet e australianëve për çështjen e ndjeshme.
Një kërcënim për sigurinë kombëtare
“Z. Assange është akuzuar për sjellje shumë të rënda kriminale në Shtetet e Bashkuara të Amerikës në lidhje me rolin e tij të dyshuar në një nga shkeljet më të mëdha të informacionit të klasifikuar në historinë e vendit tonë,” tha Blinken në një konferencë shtypi.
“Veprimet për të cilat ai dyshohet se është përgjegjës mund të përfaqësojnë dëme shumë serioze për sigurinë tonë kombëtare,” shtoi ai.
Australia mbështet përpjekjet për lirimin e Assange përpara ekstradimit të tij të mundshëm në SHBA, tha në maj kryeministri australian Antony Albanese, duke shtuar se ai ishte “i frustruar” nga ndalimi i Assange. /tesheshi.com/
