Mustafa Nano është shfaqur i zellshëm për të qenë zëri i shqiptarëve të Zvicrës, përgjithësisht kosovarë, shumë prej të cilëve me jetë fetare islame, në një paraqitje para Komisionit të Jashtëm parlamentar si aspirant për ambasador në vendin helvet.
“Shtetas shqiptarë janë rreth 6 apo 7 mijë por në tërësi shqiptarë janë mbi 300 mijë dhe në një vend të vogël si Zvicra nuk janë pak. Janë një shifër që i imponohet atij realiteti në të gjitha aspektet e në të gjitha format”, tha Nano, duke shtuar:
“E kam fjalën edhe për diasporën kosovare. Kosova ka shtetin e vetë por ambasadat tona e kanë bërë të udhës që ta mbajnë hapur derën për shqiptarët e të gjitha viseve. Duke mbajtur një fokus të veçantë që detyra që mua më takon, të përgjigjem për vendin tim, por edhe për ata shqiptarë që i përkasin vendit tim. Do doja të isha më aktiv, sa herë për shqiptarët flitet e raportohet në media, sa herë flitet në politikën zvicerane. Do doja që zëri i ambasadorit të jetë i pranishëm, në forma të caktuara”.
Me profil publicist, i vetëshpallur ateist, jo dashamirës ndaj jetës fetare e posaçërisht asaj islame, Mustafa Nano detyrohet t’i zgjasë dorën një komuniteti larg një formimi a mendësie si e tij. Gjithnjë nëse zgjidhet ambasador. /tesheshi.com/
