Kryeministri Rama ka pretenduar se Asosacioni “modern europian”, për të cilin ka dhënë një Ok dhe Albin Kurti, është pikërisht ai që është gatuar prej qeverisë shqiptare muaj më parë, dorëzuar Gjermanisë dhe Francës, por jo Kosovës.
Këtë ka lënë të nënkuptuar në një status në X, ku shkruan: “Nuk mund të jem dot më krenar se kaq për kontributin e fortë dhe konkret të Shqipërisë në vazhdimësinë e procesit të vështirë të normalizimit të marrëdhënieve midis Kosovës dhe Serbisë. Megjithatë, projektstatuti i AKShM-së, që Kosova dhe Serbia kanë pranuar si dokument të përshtatshëm pune, është draft i BE-së.
Shqipëria mbështet fuqimisht Kosovën për zbatimin e Marrëveshjes Bazë dhe do të vazhdojë të luajë rolin e saj për të nxitur paqen, stabilitetin dhe bashkëpunimin rajonal midis të gjitha vendeve të rajonit tone”, shkruan Rama, duke paralajmëruar dhe një vizitë në Prishtinë së afërmi.
“Së shpejti, do të jem në Prishtinë për të treguar personalisht mbështetjen time”, përfundon ai mesazhin në X. /tesheshi.com/
