Bashkimi Evropian është i shqetësuar se Serbia dhe Kosova nuk po zbatojnë detyrimet e tyre që dalin nga Marrëveshja për Rrugën e Normalizimit dhe Aneksi i saj Zbatues, të cilat janë të detyrueshme për ta dhe luajnë një rol në rrugën evropiane, tha Borrell këtë të martë.
Kryediplomati europian, vendi i të cilit s’e njeh ende Kosovën, kërkoi nga Kosova dhe Serbia që të angazhohen në mënyrë konstruktive dhe në mirëbesim, që nënkupton fillimin e zbatimit të marrëveshjes bazuar në propozimin e BE-së.
Në deklaratë shprehet shqetësim i veçantë për mungesën e progresit në procesin e deeskalimit të tensioneve në veri të Kosovës, për të cilin përgjegjësia bartet tek të dyja palët, por posaçërisht kërkohet që të fillohet puna për themelimin e Bashkësisë së Komunave Serbe – Asocacionit – pa vonesa dhe parakushte të mëtejshme.
“Përkundër thirrjeve të përsëritura nga BE-ja dhe partnerët e tjerë ndërkombëtarë, hapat e ndërmarrë deri më tani janë ende të pamjaftueshëm dhe situata e sigurisë në veri mbetet e tensionuar”, thuhet në deklaratë, duke shtuar se ca lëvizje të Kosovës në veri, përfshirë dhe angazhimin e forcave speciale të policisë, nuk janë në përputhje me shtetin ligjor dhe mund të rrisin më tej tensionet.
BE-ja kërkon që sulmet e grupeve të vogla kriminale dhe frikësimi i kadetëve të rinj lokalë serbë të Kosovës në policinë e Kosovës të ndalen menjëherë. /tesheshi.com/
