Nuk ka asnjë surprizë në zgjedhjet e pjesshme në Kolonjë. Ilia Stefo i së majtës është kreu i ri i Bashkisë së kësaj njësie vendore pas përballjes me Dritan Hajron që kandidoi për të djathtën. Diferenca mes tyre pas numërimit të të gjitha kutive ka rezultuar në 2100 vota, me të cilat pra e majta e mban sërish këtë bashki.
Këto zgjedhje pasuan ato të Dibrës ku gara ishte më e nxehtë dhe vëmendja politike shumë më e madhe. Por ndryshe nga Dibra, ku në vite është drejtuar dhe nga e djathta, në Kolonjë e majta ka dominuar gjithnjë – përveç Leskovikut – duke e renditur atë tek bastionet e saj.
Interesante në këto zgjedhje ishte fakti se edhe kandidati i së djathtës, Dritan Hajro vinte nga e majta. Ai u përzgjodh nga Partia Agrare Ambientaliste e drejtuar nga ish-ministri socialist Agron Duka, i lidhur tashmë në aleancë me Bashën.
Procesi i votimit të dielën u shoqërua vetëm nga një incident, ndërkohë që nga mbrëmja PD nisi të pretendojë se votat ishin blerë.
Zgjedhjet e pjesshme për kreun e Bashkisë së Kolonjës erdhën pas vdekjes së papritur si pasojë e nja ataku kardiak të Arben Malos, njeriut që e drejtonte këtë bashki. /tesheshi.com/
