Parlamenti miraton me 140 vota, pra me të gjithë deputetët e tij, Reformën në Drejtësi, një vit e gjysëm pas një përpjekjeje që solli vëmendjen e nivelit më të lartë të Shtëpisë së Bardhë dhe krerët e vendeve anëtare të Bashkimit Europian, si kancelarja Angela Merkel e krerët e Brukselit.
Në mënyrë elektronike, për rreth 20 minuta, deputetët i vunë vulën një revolucioni në sistemin e drejtësisë, i cili gjithashtu do të kërkojë dy të tretat e votove, për thuajse çdo operacion të emërimeve për pjesëtarët e trupave të lartë të gjyqësorit dhe prokurorisë.
Seancën historike të Kuvendit e nisi Fatmir Xhafa, si kryetar i komisionit të reformës dhe krerët e grupeve parlamentare.
Ra në në sy mosmbajtja e fjalimit nga kreu i grupit parlamentar të LSI-së, Petrit Vasili, ndërkohë që Mesila Doda përshëndeti në emër të deputetëve të PDIU-së.
Mesila Doda kërkoi që asnjë gjyqtar e prokuror i komunizmit të mos emërohet në sistemin e ri të drejtësisë.
Ndërkaq, përfaqësuesi i PD-së, Oerd Bylykbashi, ka falenderuar vetëm Komisionin e Venecias dhe jo ambasadorët e SHBA-së dhe BE-së, Donald Lu dhe Romana Vllahutin.
Ndërkaq, Kryeministri Edi Rama, që ka folur në emër të mazhorancës në të gjithë fjalimin e tij ka falenderuar me emër dhe mbiemër Ambasadorët Lu e Vllahutin, Presidentin Obama, Kancelaren Merkel, presidentin francez, kryeministrin italian dhe komisionerin Hahn.
Rama tha së me partnerët ndërkombëtar do të vazhdohet procesi i “revolucionit në drejtësinë shqiptare”.
Kryeministri tha se “tymi i bardhë i sotëm do të kthehet në tym të zi për të korruptuarit e gjyqësorit.
“Falenderim dhe ndjesë për çdo mik të Shqipërisë, posaçërisht për Lu dhe Vlahutin. Nëse në këtë konsensus jemi një pjesë nga halli dhe një pjesë nga malli, kjo s’ka rëndësi. Ky proces nuk do të ketë asnjë hap më të lehtë se sa ky që hodhëm sot. Gjyqtarët e prokurorët e korruptuar do t’i heqë vetingu. Duke i uruar PD-së sa më shumë fitore si ajo e djeshmja, ju ftoj të votojmë Reformën”, tha Rama.
/tesheshi.com/
