Kryeministri i Kosovës, Albin Kurti, e nisi mbledhjen e radhës së dy qeverive në Prishtinë, duke kërkuar që ajo gjendje entuziaste dhe optimizmi që shoqëronte dy anët e kufirit gjatë muajve të luftës, pra paçka kësaj të fundit, të rikthehet sot si atëherë.
“Sot bashkëpunimi mes dy shteteve tona në kohën e paqes duhet ta rindezë atë entuziazëm që pati në kohën e luftës për çlirim. Më vjen mirë të theksoj se ky bashkëpunim nuk ka qenë asnjëherë më i gjerë dhe më intensive.
Marrëdhënia mes dy vendeve tona janë dëshmi se kur nuk ekzistojnë problemet e pazgjidhura politike suksesi i marrëdhënieve në të gjitha fushat e tjera është i garantuar”, tha Kurti, pa shprehur asnjë lloj ftohtësie me homologun nga Tirana, Edi Ramën, me këtë të fundit përballë.
Dhe ishte pikërisht kjo që u cek nga Rama, në stilin e tij.
“Ishte një qen që lehte para se të hynim ne…
Qeni nuk lehu më, çka jep një mesazh për të ngjashmit e tij në botën e njerëzve që kërkojnë të fusin vazhdimisht xixa mes nesh dhe të shikojnë të shohin çështje të hapura mes meje dhe homologut këtu. Nuk ka të tilla, ne jemi shumë të hapur dhe për çështjet që nuk merremi vesh, kemi kënaqësinë e madhe t’i ndajmë duke u marrë vesh të mos merremi vesh, kështu që me të falat përkatëse për qenin e konsideroj të hapur këtë mbledhje”, tha Rama. /tesheshi.com/
